چاندی سمگلنگ کیس، تن ملزماں دی ضمانت دی درخواست منظور
کراچی (سٹاف رپورٹر) سندھ ہائیکورٹ نے سکھر توں حیدرآباد 104 کلو غیر ملکی ساخت دی چاندی دیاں اِٹاں سمگل کرن دے مقدمے وِچ گرفتار 3 ملزماں دی درخواستِ ضمانت منظور کر لئی۔
عدالت نے ملزماں ندیم میمن، محمد نوید تے محمد نعمان نوں پنج، پنج لکھ روپے دے مچلکے جمع کران دا حکم دے دِتا۔ جسٹس عدنان اقبال چودھری نے ملزماں دی درخواستِ ضمانت تے تحریری حکم نامہ جاری کر دِتا۔ تحریری حکم نامے دے مطابق پراسیکیوشن دا مؤقف سی کہ کسٹمز حکام نے مارچ وِچ خفیہ اطلاع تے کارروائی کردے ہوئے ملزماں نوں گرفتار کیتا۔ کارروائی دے دوران ملزماں دے قبضے توں غیر ملکی ساخت دی 104 کلو چاندی دیاں اِٹاں برآمد کیتیاں گئیاں۔ پراسیکیوٹر دے مطابق ملزم چاندی دی قانونی درآمد نال تعلق رکھدے دستاویزام پیش کرن وِچ ناکام رہے سن۔ استغاثہ دا کہنا سی کہ ملزم مبینہ طور تے ملک وِچ چاندی سمگل کرن توں بعد ایس نوں سکھر دے صرافہ بازار لے جاندے سن، جِتھوں چاندی تھوڑی تھوڑی مقدار وِچ ملک دے وکھ وکھ خریداراں نوں ویچی جاندی سی۔
عدالت نے قرار دِتا کہ چاندی دیاں اِٹاں کسے سرحدی علاقے توں نہیں بلکہ قومی شاہراہ توں قبضے وِچ لئیاں گئیاں نے۔ عدالت دے مطابق امپورٹ پالیسی آرڈر ملک وِچ چاندی دی درآمد تے مکمل پابندی عائد نہیں کردا بلکہ شرطاں تے پابندیاں نال چاندی درآمد کرن دی اجازت دیندا ہے۔ عدالت نے قرار دِتا کہ مقدمے دے ایس مرحلے تے ہور تفتیش تے ثبوتاں (شواہد) دا جائزہ ضروری ہے۔
