اٹارنی جنرل دے گھر پولیس نے قحبہ خانہ دی غلط اطلاع اُتے چھاپہ ماریا
انٹیلی جنس برانچ کینٹ دی غلطی، ایس ایچ او نوں ایس پی نے چھاپے دی اجازت دتی، ریڈ کروان اُتے انٹیلی جنس برانچ چارج شیٹ، انچارج نوں مقدمے وچ نامزد کیتا جائے گا، ڈی آئی جی ایڈمن عمران کشور، ایس ایس پی ڈسپلن کاشف اسلم انکوائری افسر مقرر
لاہور (کرائم رپورٹر) اٹارنی جنرل آف پاکستان دے گھر پولیس چھاپے دے حوالے نال ہور حقائق سامنے آ گئے نیں، ذرائع دے مطابق ڈسٹرکٹ انٹیلی جنس برانچ کینٹ نے ایس پی تے ایس ایچ او کینٹ نوں گھر وچ قحبہ خانہ چلن دی غلط اطلاع دتی سی، جیدے اُتے ایس ایچ او تھانہ سرور روڈ عرفان نے ایس پی کینٹ دی اجازت نال چھاپہ مار کارروائی کیتی۔ غلط جگہ اُتے ریڈ کروان اُتے ڈسٹرکٹ انٹیلی جنس برانچ کینٹ نوں چارج شیٹ کر دتا گیا اے تے انچارج ڈسٹرکٹ انٹیلی جنس برانچ کینٹ ڈویژن نوں مقدمے وچ وی نامزد کیتا جا رہیا اے۔ پولیس ذرائع دے مطابق افسر نے غلط چھاپے دی لوکیشن شیئر کرن وچ معاونت کیتی سی، معاملے دی شفاف انکوائری لئی سی سی پی او لاہور ولوں انکوائری دے احکامات جاری کر دتے گئے نیں، ڈی آئی جی ایڈمن عمران کشور تے ایس ایس پی ڈسپلن کاشف اسلم نوں انکوائری افسر مقرر کر دتا گیا اے، دونویں افسراں نے اٹارنی جنرل دے گھر دا دورہ کر کے جائے وقوعہ دا جائزہ لیا، انکوائری رپورٹ سی سی پی او لاہور نوں بھجوائی جائے گی۔
