بلوچستان: 4 دہاڑے پہلے اغوا کیتے گئے 6 مزدوراں دیاں گولیاں نال چھلنی لاشاں برآمد
دہشت گرداں نے مزدوراں نوں فائرنگ کر کے قتل کیتا، لاشاں کیچ دے نیڑلے علاقے ناصر آباد وِچ سٹّ دِتیاں: پولیس | 4 مزدوراں دا تعلق پنجاب، 2 دا پختونخوا توں: بلوچستان حکومت | شدت پسند نہتے شہریوں نوں نشانہ بنا رہے نے: وزیرِ داخلہ
کوئٹہ (سٹاف رپورٹر، مانیٹرنگ ڈیسک) بلوچستان وِچ تربت توں 4 دہاڑے (دن) پہلے اغوا کیتے گئے 6 غیر مقامی مزدوراں دیاں گولیاں نال چھلنی لاشاں برآمد ہو گئیاں۔ بلوچستان پولیس دے مطابق ضلع کیچ تحصیل تربت دے علاقے کلاتک توں 27 جولائی نوں مسلح دہشت گرداں نے 6 مزدوراں نوں اغوا کر لیا سی تے لنگھے دہاڑے (گزشتہ روز) انہاں دیاں گولیاں نال چھلنی لاشاں برآمد ہو گئیاں۔ تھانہ ناصر آباد دے ایس ایچ او داد بخش نے دَسیا کہ لاشاں تربت شہر توں تقریباً 40 کلومیٹر دور ناصر آباد وِچ اک سکول دے نیڑے توں ملیاں نے، مقتولین دیاں اکھاں تے پٹیاں بَجھیاں سن تے انہاں نوں جسم دے وکھ وکھ حصیاں تے گولیاں ماریاں گئیاں، سکیورٹی اداریاں نے موقعے تے پہنچ کے لاشاں نوں پوسٹ مارٹم لئی ٹیچنگ ہسپتال تربت منتقل کر دِتا۔
پولیس دے مطابق شہید مزدوراں وِچوں 4 دا تعلق پنجاب تے 2 دا تعلق خیبر پختونخوا توں ہے، پنجاب توں تعلق رکھن والے مقتولین وِچوں 3 افراد محمد تیمور ولد محمد رفیق، محمد وزیر ولد محمد رمضان تے محمد پرویز ولد بشیر احمد ضلع بہاولپور جبکہ اک مزدور محمد ارشد ولد محمد رفیق ضلع لودھراں تحصیل دنیا پور دا رہائشی سی۔ جبکہ خیبر پختونخوا توں تعلق رکھن والے مقتولین وِچ بونیر دے امجد خان ولد زری بان شاہ تے صوابی دے یحییٰ ولد نوروز خان شامل نے۔ تربت پولیس دے اک سینئر افسر نے واقعے دی تفصیلات دَسدے ہوئے کیہا کہ انہاں افراد نوں 27 جولائی بروز سوموار (پیر) دی شام تربت دے نواحی علاقے کلاتک دے مقام توں ایس وقت اغوا کیتا گیا جدوں مسلح شدت پسنداں نے مرکزی شاہراہ تے ناکہ بندی کر رکھی سی، ایہ مزدور اک مقامی تحصیلدار دے گھر تعمیراتی کم ختم کرن توں بعد گاڑی تے اپنے رہائشی کوارٹر ولّ جا رہے سن۔
مسلح افراد نے گاڑی توں 7 مزدوراں نوں اتارا تے کچھ دیر بعد اوتھے ہی پختونخوا ضلع صوابی توں تعلق رکھن والے اک مزدور جاوید خان نوں گولی مار کے قتل کر دِتا تے باقی چھ مزدوراں نوں اپنے نال لے گئے سن۔ بلوچستان دے معاون برائے محکمہ داخلہ بابر یوسفزئی نے واقعے دی مذمت کردے ہوئے کیہا کہ ملوث عناصر نوں قانون دے کٹہرے وِچ لایا جاوے گا، ایہ کارروائی ایسے شرپسند عناصر نے کیتی ہے جو بیرونی سرپرستی وِچ بلوچستان دے امن تے استحکام نوں نقصان پہنچان دی کوشش کر رہے نے، حکومت تے قانون نافذ کرن والے ادارے ملزماں دی گرفتاری تے انہاں نوں کٹہرے وِچ لیان لئی تمام وسائل ورتوں وِچ لیان گے۔ ایس توں علاوہ وفاقی وزیرِ داخلہ محسن نقوی نے وی واقعے دی مذمت کردے ہوئے ایس نوں اک بہیمانہ تے سفاکانہ کارروائی قرار دِتا ہے۔
اپنے بیان وِچ انہوں نے اظہارِ تعزیت کردے ہوئے کیہا کہ دہشت گرداں نے بے گناہ محنت کشاں نوں نشانہ بنا کے نہ صرف قیمتی انسانی جنداں (جاناں) چھینیاں بلکہ بلوچستان دی ترقی تے مقامی روزگار تے وی حملہ کیتا، ’’فتنہ الہندوستان‘‘ توں تعلق رکھن والے شدت پسند ہُن معصوم تے نہتے شہریوں نوں نشانہ بنا رہے نے، ذمہ داراں نوں قانون دے کٹہرے وِچ لایا جاوے گا۔ ایدھر وزیراعلیٰ پنجاب مریم نواز نے وی کیچ وِچ دہشت گردی دے واقعے دی مذمت کردے ہوئے دہشت گرداں دی فائرنگ توں 6 مزدوراں دی شہادت تے ڈونگھے (گہرے) دکھ تے افسوس دا اظہار کیتا۔ انہوں نے اپنے بیان وِچ کیہا کہ سانحہِ کیچ فتنہ الہندوستان دے شیطان صفت دہشت گرداں دی بدترین بربریت ہے۔
