دوجا مرحلہ وی دھاندلی زدہ، دوبارہ الیکشن دے مطالبے دا حق محفوظ: بلاول
دھاندلی نال ن لیگ نوں جتایا گیا تاں لوکاں دا چنوتی عمل تے ریاستی اداریاں تے اعتبار ٹٹ جائے گا: چیئرمین پی پی؛ مشتاق شاہ دے قتل دی مذمت؛ ایہوجہے الیکشن نتائج نوں کوئی منے گا نہیں: راجہ پرویز اشرف؛ نیئر بخاری، شیری رحمن، قمر زمان کائرہ، ندیم چن دے وی تحفظات
اسلام آباد، راولپنڈی، مظفر آباد (سٹاف رپورٹر، نیوز رپورٹر، نیوز ایجنسیاں، مانیٹرنگ ڈیسک) پیپلز پارٹی نے آزاد کشمیر چناؤ (الیکشن) دے دوجے مرحلے وچ وی دھاندلی دا الزام لایا اے۔ چیئرمین پیپلز پارٹی بلاول بھٹو زرداری نے ایکس (ٹویٹر) تے جاری بیان وچ کہیا کہ الیکشن کمیشن ہن تک آزاد کشمیر چناؤ دے پہلے مرحلے وچ ساڈیاں شکایتاں تے کوئی کارروائی کرن وچ ناکام رہیا اے، جے نوٹس لے لیا جاندا تاں دوجے مرحلے دے چناؤ دی ساکھ بچ سگدی سی۔ پیپلز پارٹی احتجاج کرن تے دوبارہ الیکشن دا مطالبہ کرن دا حق محفوظ رکھدی اے، اسیں دوجے مرحلے دے الیکشن وچ بیلٹ بکس بھرن تے ساڈے پولنگ ایجنٹاں نوں غیر قانونی طور تے پولنگ سٹیشناں توں باہر کڈھن دے بارے کئی لکھت شکایتاں پہلے ہی جمع کرا چکے ہاں، امید اے کہ الیکشن کمیشن چھیتی کارروائی کرے گا۔
اوہناں نے حلقہ ایل اے 31 وچ پیپلز پارٹی دے ورکر مشتاق شاہ تے قاتلانہ حملے وچ جاں بحق ہون دے واقعے دی مذمت کردے ہوئے ایس نوں ڈاہڈا افسوسناک قرار دتا تے شہید مشتاق شاہ دے ٹبر نال دلی ہمدردی تے تعزیت دا اظہار کردے ہوئے کہیا کہ وہ ایس المناک سانحے تے دکھی ہن۔ قائم مقام صدر آزاد جموں و کشمیر چودھری لطیف اکبر تے حملے توں بعد اوہناں دے ای انتخابی حلقے وچ پیپلز پارٹی دے ورکر مشتاق شاہ دی شہادت نے مسلم لیگ (ن) دی نیت نوں ننگا کر دتا اے۔ مسلم لیگ (ن) آزاد کشمیر وچ گولی، لاٹھی تے زور زبردستی نال لوکاں دے ووٹ تے ڈاکا مارن دی کوشش کر رہی اے۔ جے دھاندلی نال مسلم لیگ (ن) نوں کامیاب کرایا گیا تاں ایس نال آزاد کشمیر دے لوکاں دا چنوتی عمل تے ریاستی اداریاں تے اعتبار ٹٹ جائے گا۔ اوہناں نے مطالبہ کیتا کہ مشتاق شاہ دے قتل دی چھیتی، صاف تے غیر جانبدارانہ تفتیش کر کے ذمہ دار بندیاں نوں قانون دے مطابق سخت سزا دتی جائے۔
سابق وزیراعظم راجہ پرویز اشرف نے الیکشن وچ بڑے پیمانے تے دھاندلی دے الزام لاؤندے ہوئے کہیا کہ موجودہ انتخابی عمل صاف شفاف نہیں رہیا، دھاندلی زدہ الیکشن دے نتائج نوں کوئی وی تسلیم نہیں کرے گا۔ پیپلز پارٹی نے انتخابی دھاندلی دے ثبوت الیکشن کمیشن نوں دتے پر انہاں شکایتاں تے کوئی اثر دار کارروائی نہیں کیتی گئی۔ موجودہ حال توں ایہی تاثر ملدا اے کہ آزاد کشمیر دے الیکشن وچ ‘سب کچھ پہلے توں طے’ اے، میرپور ڈویژن وچ پیپلز پارٹی دے کامیاب امیدواراں نوں ہار وچ بدلا گیا۔ مسلم لیگ (ن) دے آگو ووٹ چوری نوں معمولی واقعہ قرار دے رہے ہن حالانکہ ‘بیلٹ پیپر جھوٹ نہیں بولدے’۔ اوہناں نے صدر آزاد کشمیر لطیف اکبر نال پیش آؤن والے واقعے دا حوالہ دندے ہوئے کہیا کہ اوہناں نوں مکے مارے گئے پر ایس واقعے نوں محض توتکار قرار دتا جا رہیا اے جو سچائی دے الٹ اے۔
دوجے پاسے مرکزی ترجمان پیپلز پارٹی پارلیمنٹیرینز شازیہ مری نے رکن قومی اسمبلی صلاح الدین جونیجو تے فائرنگ دے واقعے دی مذمت کردے ہوئے ایس نوں ڈاہڈا افسوسناک تے قابل مذمت قرار دتا تے کہیا کہ واقعے وچ ملوث بندیاں نوں چھیتی گرفتار کر کے قانون دے مطابق کارروائی کیتی جائے۔
ایسے دوران پیپلز پارٹی دی سینیٹر شیری رحمن نے کہیا کہ انتخابی عملے دی دیری پاروں ووٹراں نوں ڈاہڈیاں مشکلاں دا سامنا رہیا، زیادہ تر پولنگ سٹیشناں تے پولنگ دیری دا شکار ہوئی جو انتخابی پربندھاں تے بھارے سوال کھڑے کردی اے۔
آگو پیپلز پارٹی نیئر بخاری نے ن لیگ تے دھاندلی دا الزام لاؤندے ہوئے شیر تے مہر لگے بیلٹ پیپر پریس کانفرنس وچ وکھاؤندے ہوئے کہیا کہ ن لیگ بکسے بھر کے اپنے امیدواراں نوں جتاونا چاہندی اے، اسیں ایس قسم دے الیکشن نوں من نہیں سکدے۔ مظفرآباد وچ پریس کانفرنس دے دوران اوہناں کہیا کہ الیکشن توں جو حکومت بنے گی اوہدی کیہ ساکھ ہووے گی؟
مظفرآباد وچ چودھری مجید دے نال پریس کانفرنس کردے ہوئے قمر زمان کائرہ نے کہیا کہ آزاد کشمیر الیکشن دے پہلے مرحلے وچ تحفظات دے باوجود دوجے مرحلے وچ حصہ لیا پر پھر اوہی چال چلی گئی، چودھری لطیف اکبر تے قاتلانہ حملہ کیتا گیا، ادھیاں پولنگ سٹیشناں تے عملہ 11، ساڑھے 11 وجے پہنچیا، پھر عملہ آیا تاں اوہناں نوں ن لیگ والے اپنے نال لے گئے تے ٹھپے لائے، ایل اے 28 بازل نقوی دے حلقے دی 3 یونین کونسلاں وچ سامان ہی نہیں پہنچیا۔
پیپلز پارٹی دے آگو ندیم افضل چن نے پریس کانفرنس دے دوران کہیا کہ آزاد کشمیر وچ الٹرا فارم 47 والا الیکشن نظر آ رہیا اے، کسے صورت ایس الیکشن نوں آزادانہ تے شفاف نہیں مناں گے، اسیں اج 15 توں زیادہ درخواسستاں جمع کرا دتیاں ہن، کئی حلقیاں وچ پولنگ سٹاف تے سامان پہنچ ہی نہیں سکیا، ساڈے پولنگ ایجنٹاں نوں پولنگ بوتھاں توں باہر کڈھیا گیا اے، اک پارٹی نوں راج دوائون لئی ایہہ سب کیتا جا رہیا اے، ساڈیاں شکایتاں تے ن لیگ دا جواب نہیں آیا، جے شکایتاں دا حل نہ کڈھیا گیا تاں الیکشن دے نتائج نوں کوئی نہیں منے گا۔
