قومی ڈائیلاگ دا آغاز کیتا جائے، عمران سمیت سارے سیاسی قیدیاں نوں رہا کیتا جائے: جماعت اسلامی
ہر ادارہ آئینی حدّاں وچ رہ کے کم کرے، صاف شفاف الیکشن، آزاد عدلیہ تے بااختیار بلدیاتی نظام سمیت 14 نکاتی اصلاحاتی ایجنڈا پیش؛ انتظامی یونٹاں دی ونڈ کوئی وڈا مسئلہ نہیں، ایہہ معاملے قومی اتفاقِ رائے نال طے کیتے جا سکدے ہن: حافظ نعیم الرحمن دا ویڈیو پیغام
کراچی (سٹاف رپورٹر) امیر جماعت اسلامی حافظ نعیم الرحمن نے کہیا اے کہ جے نظام بناؤن تے چلاؤن والیاں نے اپنی ناکامی دا اعتراف کر لیا اے تاں ہن وڈے قومی فائدے لئی نیشنل ڈائیلاگ دا آغاز کیتا جائے تے عمران خان سمیت سارے سیاسی قیدیاں نوں رہا کیتا جائے۔
اپنے ویڈیو پیغام وچ اوہناں نے صاف شفاف الیکشن، آزاد عدلیہ، متناسب نمائندگی دی بنیاد تے انتخابی نظام، بااختیار بلدیاتی حکومتاں، سیاسی پارٹیاں دے اندر جمہوریت نوں ودھاؤن تے خاندانی و شخصی اجارہ داری دے خاتمے سمیت 14 نکاتی اصلاحاتی ایجنڈا پیش کیتا۔
حافظ نعیم الرحمن نے کہیا کہ قومی ڈائیلاگ دا پہلا نکتہ ایہہ ہونا چاہی دا اے کہ اگے توں لوکاں دے مینڈیٹ تے کوئی ڈاکا نہیں ماریا جائے گا تے لوک جیہنوں ووٹ دیوݨ یا رد کرن، ایس فیصلے دا احترام کیتا جائے گا۔ ہر ادارہ اپنی آئینی حدّاں وچ رہ کے کم کرے۔ اوہناں نے مطالبہ کیتا کہ عدلیہ نوں پوری آزادی دتی جائے تے ججاں دی تقرری حکمراناں دی پسند ناپسند دی تھاں میرٹ تے کیتی جائے۔
متناسب نمائندگی دی بنیاد تے الیکشن نال لوک شخصیات، جاگیرداراں تے وڈیریاں دی تھاں سیاسی پارٹیاں دے منشور نوں ووٹ دیوݨ گے، جیہدے نال جمہوریت تکڑی ہووے گی۔ قومی گل بات دے ایجنڈے وچ خاندانی سیاست دا خاتمہ، سیاسی پارٹیاں دے اندر جمہوری نظام نوں ودھاؤنا تے بااختیار مقامی حکومتاں دا قیام وی شامل ہونا چاہی دا اے۔
انتظامی یونٹاں دی ونڈ کوئی وڈا مسئلہ نہیں، ایہہ معاملے قومی اتفاقِ رائے نال طے کیتے جا سکدے ہن، پر جے آئین وچ موجود اصولاں تے ای عمل نہیں ہو رہیا تاں نویاں بحثاں نال ہور رولا پئے گا، ایس لئی سب توں پہلے آئین تے پورا عمل درآمد یقینی بنایا جائے۔
اوہناں نے بلوچستان، خیبر پختونخوا تے آزاد کشمیر دے مسئلیاں دے حل لئی قومی جرگہ بناؤن، معدنیات بارے جامع قومی پالیسی بناؤن، پاک-ایران گیس پائپ لائن پوری کرن، بجلی، گیس تے پٹرول دیاں قیمتاں وچ گھاٹا کرن تے سارے شہریاں لئی اکو جہے نظام دی فراہمی، مصنوعی ذہانت (AI) تے زراعت دے شعبیاں دی ترقی، زرعی اصلاحات، انگریزاں دے دور وچ دتیاں گئیاں جاگیراں دی کساناں وچ ونڈ، کھیڈاں وچ سیاسی تقرریاں دے خاتمے تے مقابلے دے امتحان قومی بولی وچ لیݨ دیاں تجویذاں وی پیش کیتیاں۔
