گیلانی تے راجہ پرویز دی ملاقات، پارلیمانی اداریاں نوں تکڑا کرن تے زور

سینیٹ نوں ہور تکڑا کرن لئی سنبھلیاں پارٹیاں نال مشاورت کیتی جائے گی: یوسف رضا

اسلام آباد (اپنے رپورٹر توں) چیئرمین سینیٹ سید یوسف رضا گیلانی نال سابق وزیراعظم تے پیپلز پارٹی دے سینئر آگو راجہ پرویز اشرف نے اسلام آباد وچ ملاقات کیتی، جس وچ دیس دی مجموعی سیاسی حالت، پارلیمانی تے آپسی دلچسپی دے وکھ وکھ معاملیاں تے تفصیلی گل بات کیتی گئی۔

دواں آگوآں نے دیس وچ جمہوری قدراں دے استحکام، پارلیمانی اداریاں نوں تکڑا کرن، آئین دی بالادستی تے قومی یکجہتی نوں ودھاؤن دی لوڑ تے زور دتا۔ ایس موقعے تے ایس گل تے اتفاق کیتا گیا کہ قومی مسئلیاں دے حل تے دیس نوں درپیش چیلنجاں نال ٹکران لئی ساریاں سیاسی طاقتاں وچکار مثبت تے تعمیری گل بات وقت دی وڈی لوڑ اے۔

چیئرمین سینیٹ نے ایس عزم دا اظہار کیتا کہ سینیٹ نوں اک اثر دار، متحرک تے جامع ایوان دے طور تے ہور تکڑا کرن لئی ساریاں سیاسی پارٹیاں نال مشاورت تے ساتھ نوں ودھایا جائے گا۔

راجہ پرویز اشرف نے کہیا کہ تکڑے جمہوری ادارے ای دیس دی سیاسی تے معاشی ترقی دی ضمانت ہن۔