حضرت داتا گنج بخشؒ دے عرس دیاں 3 دہاڑیاں دیاں تقریباں دا آغاز
نائب وزیراعظم اسحاق ڈار نے مزار تے چادر پا کے تقریباں دا افتتاح کیتا
لاہور (ہیلتھ رپورٹر، سیاسی نمائندہ، نیوز ایجنسیاں) برصغیر دے عظیم روحانی آگو حضرت سید علی بن عثمان ہجویریؒ المعروف حضرت داتا گنج بخشؒ دے 983 ویں سالانہ عرس دیاں تن دہاڑیاں دیاں تقریباں لاہور وچ شروع ہو گئیاں۔ نائب وزیراعظم پاکستان محمد اسحاق ڈار نے اتوار دی سویر مشیر وزیراعلیٰ پنجاب علی ڈار، صوبائی وزیر ہاؤسنگ بلال یسٰین، وزیر خزانہ میاں مجتبیٰ شجاع الرحمن، چیئرمین اسلامی نظریاتی کونسل ڈاکٹر راغب حسین نعیمی، سیکرٹری اوقاف پنجاب ڈاکٹر احسان بھٹہ دے نال چادر پاؤن دی رسم نال عرس دیاں تقریباں تے دُدھ دی سبیل دا افتتاح کیتا۔
خطیب جامع مسجد داتا دربار نے دعا کروائی، چادر پاؤن دی رسم توں بعد سینیٹر اسحاق ڈار نے محکمہ اوقاف و مذہبی امور پنجاب دی خاص کتاب “حضرت داتا گنج بخشؒ، کاملاں را رہنما” دا وی افتتاح کیتا۔ محکمہ مواصلات و تعمیرات تے نیسپاک دے اہلکاراں نے ڈپٹی وزیراعظم تے دوجیاں شخصیتاں نوں داتا دربار دے وادھے (توسیعی) منصوبے بابت بریفنگ دتی۔
افتتاحی تقریب نال خطاب کردیاں سینیٹر اسحاق ڈار نے کہیا کہ حضرت داتا گنج بخشؒ دا عرس نہ صرف وڈا روحانی اکٹھ اے بلکہ اسلامی قدراں، قومی یکجہتی تے مسلماناں وچکار بھائی چارے نوں ودھاؤن دا وی اثر دار ذریعہ اے۔
ایسے دوران سالانہ چادر پاؤن دی رسم دے موقعے تے زائرین دی حفاظت لئی سکیورٹی دے سخت پربندھ کیتے گئے سن۔ تقریباں دے پہلے دہاڑے لوکاں دے وڈے اکٹھ دا مزار تے حاضری دیݨ، عقیدت دے پھل نچھاور کرن تے چادراں چڑھاؤن دا سلسلہ جاری رہیا، نمازِ ظہر توں بعد محفلِ حسنِ قرأت سجائی گئی۔ اج محافلِ سماع دا افتتاح سویر 10:00 وجے رشید ایونٹس کمپلیکس بلال گنج لاہور وچ ہووے گا، تقریباں کل 4 اگست نوں آخری دعا نال مک جان گیئاں۔
