سندھ دی ونڈ دے مطالبیاں تے سازش نوں رد کرنے آں: سردار رحیم
حکمران لوکاں نوں سکھ (ریلیف) دیݨ دی تھاں نویں صوبیاں دے جھیڑے نوں ہوا دے رہے ہن؛ مسلم لیگ فنکشنل سندھ دی ونڈ (تقسیم) دے خلاف پوری طاقت نال جدوجہد جاری رکھے گی: بیان
کراچی (سٹاف رپورٹر) پاکستان مسلم لیگ فنکشنل سندھ دے سیکرٹری جنرل سردار عبدالرحیم نے کہیا اے کہ پاکستان مسلم لیگ فنکشنل سندھ دی ونڈ دے کسے وی منصوبے نوں پہلے وی دوٹوک انداز وچ رد کردی آئی اے تے اج وی سندھ دی ونڈ دے ہر مطالبے تے ہر سازش نوں مکروں رد کردی اے۔
اپنے اک بیان وچ اوہناں دا کہنا سی کہ دیس ایس وقت بھارے معاشی بحران، مہنگائی، بے روزگاری، وسائل دی تھوڑ، توانائی دے مسئلیاں تے کھرباں روپیاں دے قرضیاں دے بوجھ تھلے دبیا ہویا اے، پر افسوس کہ جعلی مینڈیٹ دے سہارے اقتدار وچ آؤن والے حکمران لوکاں نوں سکھ دیݨ، معیشت نوں تکڑا کرن تے چنگا نظام (گڈ گورننس) قائم کرن دی تھاں نویں صوبیاں دے قیام جیسے جھیڑے والے تے غیر ضروری معاملیاں نوں ہوا دے رہے ہن۔
اوہناں کہیا کہ ایہوجہے اوکھے حالات وچ قوم نوں اک رکھن، قومی یکجہتی نوں ودھاؤن تے لوکاں دے مسئلے حل کرن دی تھاں صوبیاں دی ونڈ دی گل چھیڑنا انتہائی غیر ذمہ دارانہ، نا سمجھی والا تے لوکاں دھیان حکمراناں دیاں ناکام پالیسیاں تے ماڑی کارکردگی توں ہٹاؤن دی کوشش اے۔ ایس قسم دے بیانات نال دیس وچ نفرت، ونڈ تے انتشار نوں وادھا مل سکدا اے، جو کسے وی صورت قومی مفاد وچ نہیں۔
سردار عبدالرحیم نے کہیا کہ سندھ پاکستان دی معاشی شاہ رگ اے تے ایس دی وحدت تے کوئی سمجھوتہ نہیں کیتا جا سکدا۔ سندھ دے لوک اپنی دھرتی دی ونڈ کسے وی صورت قبول نہیں کرن گے۔ پاکستان مسلم لیگ فنکشنل سندھ دے لوکاں دے جذبات دی ترجمان اے تے سندھ دی ونڈ دے ہر منصوبے دے خلاف پوری سیاسی، آئینی تے جمہوری جدوجہد جاری رکھے گی۔
