پنشن پکا حق اے، برطرف ملازماں دی پچھلی سروس نوں اکھوں پرجھے نہیں کیتا جا سکدا: سپریم کورٹ

خیبر پختونخوا سیکڈ ایمپلائز ایکٹ 2012 دے تحت بحال ملازم سینیارٹی، ترقی تے بیک بینیفٹس دے حقدار نہیں: تفصیلی فیصلہ

نان تے نفقہ دا فیصلہ کردے ہوئے بچے دی لوڑ تے پیو دی مالی حالت نوں دھیان وچ رکھیا جائے گا: عدالت، سندھ ہائیکورٹ دا فیصلہ برقرار

اسلام آباد (اے پی پی) سپریم کورٹ نے قرار دتا اے کہ پنشن اک مستقل قانونی تے آئینی حق اے، ایس نوں بیک بینیفٹس نال رلاؤیا نہیں جا سکدا۔ برطرف ملازماں دی پچھلی (سابقہ) سروس نوں پنشن لئی اکھوں پرجھے (نظر انداز) نہیں کیتا جا سکدا۔

سپریم کورٹ دے جسٹس محمد علی مظہر تے جسٹس مسرت ہلالی تے مشتمل دو رکنی بینچ نے خیبر پختونخوا حکومت تے برطرف تھیالوجی استاداں دی دائر سول پٹیشنز تے تفصیلی فیصلے وچ قرار دتا کہ خیبر پختونخوا سیکڈ ایمپلائز (اپائنٹمنٹ) ایکٹ 2012 دے تحت بحال ملازم سینیارٹی، ترقی تے بیک بینیفٹس دے حقدار نہیں، پر قانون وچ پچھلی سروس نوں پنشن لئی گنݨ (شمار کرن) تے کوئی واضع پابندی موجود نہیں۔ بیک بینیفٹس توں مراد برطرفی دے دوران دیاں تنخواہواں، الاؤنسز تے ہور مالی واجبات ہن جدکہ پنشن اک وکھرا قانونی حق اے جو ریٹائرمنٹ تے ملدا اے، دوناں نوں اک پدھر (زمرے) وچ نہیں رکھیا جا سکدا۔ پنشن بڑھاپے وچ مالی تحفظ دیݨ دا ذریعہ اے تے حکومت یا کوئی محکمہ واضع قانونی اختیار توں بغیر کسے ملازم نوں پنشن یا پنشنری مراعات توں محروم نہیں کر سکدا۔ 2012 دا قانون برطرف ملازماں نال ہوئی ناانصافی دے ازالے لئی بنایا گیا سی۔

ایس توں علاوہ جسٹس عرفان سعادت خان تے جسٹس عقیل احمد عباسی تے مشتمل دو رکنی بینچ نے قرار دتا کہ نانے (نابالغ) بچے دے نان تے نفقہ دا تعین کردے وقت بچے دی معقول لوڑ، پیو دی مالی حالت، آمدن تے سماجی حیثیت نوں دھیان وچ رکھیا جائے گا جدکہ نچلی عدالتاں دے طے کیتے نان تے نفقہ دی رقم وچ دخل اندازی صرف اوہدوں کیتی جا سکدی اے جدوں فیصلہ واضع طور تے من مانی، غیر معقول یا قانون دے خلاف ہووے۔ عدالت نے شاہین نواز دی اپیل دی اجازت دی درخواست رد کردے ہوئے سندھ ہائیکورٹ دا فیصلہ برقرار رکھیا۔ عدالت نے قرار دتا کہ ریکارڈ توں ظاہر ہوندا اے کہ اپیلیٹ کورٹ تے ہائیکورٹ نے پیو دی آمدن، مالی وسائل، کفالت دیاں ہور ذمہ داریاں تے بچے دی لوڑ دا تفصیلی جائزہ لیݨ توں بعد نان تے نفقہ مقرر کیتا۔

درخواست گزار نچلی عدالتاں دے فیصلیاں وچ قانونی خامی، ثبوتاں دا غلط جائزہ یا اختیارات دا ناجائز استعمال ثابت نہیں کر سکی۔

ہور ایہہ کہ سپریم کورٹ نے قرار دتا کہ عدالت وچ وکیل ولوں دتی گئی رضامندی تے بیان دا موکل پابند ہوندا اے تے بعد وچ صرف ایہہ موقف اپناؤنا کہ وکیل نے اجازت توں بغیر رضامندی دتی، عدالتی حکم ختم کراؤن لئی کافی نہیں۔ ضابطہ دیوانی دی دفعہ 12(2) دے تحت کسے عدالتی حکم نوں صرف اوہدوں کالعدم قرار دتا جا سکدا اے جدوں فراڈ یا غلط بیانی دے واضع، ٹھوس تے منن جوگ ثبوت موجود ہووݨ، صرف عام الزامات قانونی طور تے منن جوگ نہیں۔ جسٹس عرفان سعادت خان تے جسٹس عقیل احمد عباسی تے مشتمل دو رکنی بینچ نے تفصیلی فیصلے وچ محمد اشرف دی درخواستِ اجازتِ اپیل رد کر دتی۔ عدالت نے قرار دتا کہ درخواست گزار نے ہائیکورٹ دی مہلت توں پورا فائدہ چکایا، سندھ ہائیکورٹ دے فیصلے وچ کوئی قانونی یا دائرہ اختیار نال جڑی خرابی نہیں۔