وفاقی وزیر داخلہ دا شملہ پہاڑی نادرا رجسٹریشن سنٹر دا دورہ
شہریاں توں درپیش مسئلے پੁੱچھے، وکھو وکھ سروس کاؤنٹرز دا معائنہ کیتا۔ شہریاں دا اعتماد کسے وی ادارے دی کامیابی دا اصل پیمانہ ہوندا اے: محسن نقوی
لاہور، اسلام آباد (مانیٹرنگ ڈیسک، اے پی پی): وفاقی وزیر داخلہ محسن نقوی نے شملہ پہاڑی نادرا رجسٹریشن سنٹر لاہور دا اچانک دورہ کیتا، شہریاں توں رجسٹریشن دے کم تے درپیش مسئلے دریافت کیتے۔ اوہناں نے وکھو وکھ سروس کاؤنٹرز دا معائنہ کرن نال ملازماں نال ملاقاتاں کیتیاں، آپریشنل کارکردگی دا جائزہ لِتا۔ وفاقی وزیر محسن نقوی نے فیملی رجسٹریشن سرٹیفکیٹ لئی دو شہریاں دے مسئلے فوری حل کرن دی ہدایت جاری کیتی۔ اوہناں نے نادرا ملازماں نوں ہدایت کیتی کہ مختلف خدمتاں لئی لوڑیندے کاغذات دے سلسلے وچ شہریاں دی سہی رہنمائی کیتی جاوے تاینکہ غیر ضروری دیر توں بچیا جا سکے، فیملی رجسٹریشن سرٹیفکیٹ ریکارڈ تک رسائی دے نظام نوں ہور بہتر بنایا جائے گا۔
اس موقع اُتے نادرا سنٹر دی کارکردگی بارے شہریاں دی مجموعی رائے بہت چنگی سی، پر کجھ شہریاں نے شکایت کیتی کہ سنٹر باہر پارکنگ اٹینڈنٹ سرکاری طور اُتے دسے گئے ریٹ توں زیادہ فیس وصول کر رہے نیں۔ وفاقی وزیر نے شکایات دا نوٹس لیندیاں ہویاں آکھیا کہ ایسے مسلیاں نوں وی حل کیتا جائے گا۔ محسن نقوی نے مزید آکھیا کہ مَیں نے ماضی وچ شملہ پہاڑی نادرا سنٹر دا دورہ کیتا سی تے عوامی خدمتاں وچ وڈی بہتری ویکھ کے خوشی ہوئی، شہریاں دا اعتماد تے اطمینان کسے وی سرکاری ادارے دی کامیابی دا اصل پیمانہ ہوندا اے۔
