سرمایہ کاراں نوں جی آیاں نوں، نویں کاروبار لئی زیرو ٹائم ٹو سٹارٹ پالیسی نافذ: مریم نواز
ون ونڈو آپریشن تے ساریاں این او سیز دی فوری فراہمی دا یکجا نظام قائم، بیوروکریٹک رکاوٹاں ختم: وزیرِ اعلیٰ؛ او پی ایف دی گرین اکنامک زون دی تجویز تے آمادگی؛ سروسز ہسپتال نوں سٹروک ایوارڈ ملن تے مبارکباد۔
لاہور (سٹاف رپورٹر) وزیرِ اعلیٰ مریم نواز شریف نے کہیا اے کہ پنجاب وچ ہر سرمایہ کار نوں جی آیاں نوں کہندے آں، پنجاب ہر قسم دی سرمایہ کاری لئی مکمل طور تے تیار اے، پنجاب وچ سارے نویں کاروبار تے صنعتاں شروع کرن لئی زیرو ٹائم ٹو سٹارٹ پالیسی نافذ کیتی گئی اے۔ اوہ اوورسیز پاکستانیز فاؤنڈیشن (OPF) دے وفد نال گل بات کر رہیاں سن، چیئرمین او پی ایف سید قمر رضا نے وزیرِ اعلیٰ نوں گرین انڈسٹریل اکنامک زون دے قیام تے تفصیلی بریفنگ دتی۔ ملاقات وچ او پی ایف تے گرین انرجی گروپ دے اشتراک نال پنجاب وچ جدید گرین اکنامک زون قائم کرن دی تجویز پیش کیتی گئی، وزیرِ اعلیٰ نے گرین اکنامک زون دی تجویز تے آمادگی دا اظہار کیتا تے عملدرآمد لئی جامع ایکشن پلان منگ لیا۔
اوہناں نے مقامی تے غیر ملکی سرمایہ کاراں لئی خصوصی مراعاتی پیکیج دا اعلان وی کیتا، گرین انڈسٹریل زون دے قیام نال 18 ہزار توں ودھ لوکاں نوں جدید روزگار ملن تے سالانہ 5.6 ارب روپے آمدن دی توقع اے۔ وزیرِ اعلیٰ نے کہیا کہ سرمایہ کاراں دی سہولت لئی ون ونڈو آپریشن تے ساریاں این او سیز دی فوری فراہمی دا یکجا نظام قائم اے، پنجاب وچ ساریاں انتظامی و بیوروکریٹک رکاوٹاں توں پاک، مکمل محفوظ تے پرامن تجارتی ماحول فراہم کیتا جا رہیا اے۔ ساڈا عزم اے کہ پنجاب نوں جدید ترین گرین انڈسٹری تے تجارتی سرگرمیاں دا عالمی مرکز بنائیے۔
ایس دوران وزیرِ اعلیٰ پنجاب دی صوبے بھر وچ شعبۂ صحت وچ بہتری لئی کوشساں دا اعتراف عالمی سطح تے وی کیتا گیا۔ سروسز ہسپتال شعبۂ نیورالوجی دی سٹروک کیئر وچ خدمات تے ایہنوں ڈبلیو ایس او/اینجلز ولوں ڈائمنڈ ایوارڈ دے عظیم ترین طبی اعزاز نال نوازیا گیا، وزیرِ اعلیٰ نے پرنسپل سمز پروفیسر ڈاکٹر زہرہ خانم، ہیڈ شعبۂ نیورالوجی پروفیسر ڈاکٹر محمد عدنان اسلم تے پوری ٹیم نوں مبارکباد تے شاباش دتی۔
فالج دے مریض دی بحالیٔ صحت دیاں کوشساں دے چنگے نتائج لئی سروسز ہسپتال دے سٹروک ایمرجنسی سنٹر نوں بہترین قرار دتا گیا۔ مریم نواز دی قیادت وچ سروسز ہسپتال شعبۂ نیورالوجی ڈائمنڈ ایوارڈ فار ایکسی لینس ان سٹروک کیئر حاصل کرن والا پبلک سیکٹر دا پہلا ملکی ادارہ بن گیا، سروسز ہسپتال شعبۂ نیورالوجی نوں ٹھرومبولائسز لئی ڈور ٹو نیڈل ٹائم وچ بہترین قرار دتا گیا۔ وزیرِ اعلیٰ مریم نواز نے کہیا اے کہ پنجاب سٹروک پروگرام لئی ڈائمنڈ ایوارڈ سرٹیفکیٹ نہیں بلکہ بروقت علاج تے جدید طبی سہولتاں پاروں بچائیاں گیاں ہزاراں انسانی جندڑیاں دا اعتراف اے۔ اوہناں نے شکرانے دا اظہار کردیاں کہیا کہ سروسز ہسپتال دے دنیا بھر دے بہترین سٹروک سنٹراں وچ شامل ہوݨ تے اللہ دا شکر ادا کردے آں۔ سٹروک سنٹر سروسز ہسپتال لئی ڈائمنڈ ایوارڈ دا اعزاز تاریخی کامیابی اے، پنجاب وچ فالج دے مریضاں نوں بہترین تے عالمی معیار دیاں طبی سہولتاں فراہم کرن دے مشن نوں ہور اگے ودھاؤندے رہاں گے، سٹروک کیئر دے معیار نوں نویاں بلندیاں تک لے کے جاویں گے۔
