محسن نقوی دی وزیرِ اعظم نال ملاقات، گل بات نال شدید اختلاف: رانا ثناء اللہ
ملاقات انتہائی خوشگوار ماحول وچ ہوئی، سکیورٹی صورتِ حال دا تفصیلی جائزہ لیا گیا؛ اسٹیبلشمنٹ نے ڈیڈ لائن نہیں دتی، کابینہ وچ معاملات واضح: مشیر وزیرِ اعظم۔
لاہور (اپنے نامہ نگار توں، مانیٹرنگ ڈیسک) وزیرِ اعظم محمد شہباز شریف نال وفاقی وزیرِ داخلہ محسن نقوی نے ملاقات کیتی، ذرائع دے مطابق ملاقات انتہائی خوشگوار ماحول وچ ہوئی، ملاقات وچ ملکی سیاسی تے سکیورٹی صورتِ حال تے تبادلۂ خیال کیتا گیا۔ دسیا گیا اے کہ ایہ ملاقات لاہور وچ ماڈل ٹاؤن وچ ہوئی، ذرائع دے مطابق ملاقات دوران ملکی داخلی سکیورٹی دی صورتِ حال دا تفصیلی جائزہ لیا گیا۔ ایس دوران وزیرِ اعظم دے مشیر رانا ثناء اللہ نے کہیا ایہ ٹھیک اے کہ مسلم لیگ (ن) دے صدر نواز شریف نے محسن نقوی نوں جواب دین توں منع کر دتا اے، رانا ثناء اللہ نے کہیا محسن نقوی دی گل بات تے اوہناں دا اندازِ بیان قابلِ اعتراض اے تے مسلم لیگ (ن) نوں ایس تے شدید اختلاف اے۔
اوہناں نے کہیا دیس دے نظام وچ کوئی خرابی نہیں بلکہ مسئلہ ایس تے عملدرآمد دا اے، اوہناں نے کہیا جے نظام تے عمل نہ کیتا جائے تے پھر ایہ کہیا جائے کہ نظام ناکام ہو چکا اے تاں ایس نال کوئی چنگا نتیجہ حاصل نہیں ہوئے گا۔ اک سوال دے جواب وچ رانا ثناء اللہ نے ایس تاثر نوں رد کردیاں کہیا کہ اسٹیبلشمنٹ ولوں حکومت نوں کسی قسم دی کوئی ڈیڈ لائن نہیں دتی گئی۔ کابینہ دے اجلاس وچ کئی معاملات واضح ہو جان گے تے حکومتی مؤقف وی سامنے آ جائے گا۔ اک سوال دے جواب وچ رانا ثناء اللہ نے کہیا جے وزیرِ اعظم محسن نقوی نوں بلاؤن گے تاں اوہ کیوں نہیں آؤن گے۔
