وزیرِ مذہبی امور نے محسن نقوی دی حمایت کر دتی
پختونخوا اسمبلی وچ نویں صوبے دے حق وچ قرارداداں منظور ہو چکیاں نیں: سردار یوسف؛ مسلیاں دا حل نویں صوبیاں دا قیام اے، معیشت وچ بہتری آئے گی: سینیٹر طلحہ محمود۔
اسلام آباد (مانیٹرنگ ڈیسک) وفاقی وزیرِ مذہبی امور سردار محمد یوسف نے نویں صوبیاں دے قیام دے حوالے نال وزیرِ داخلہ محسن نقوی دے مؤقف دی حمایت کر دتی اے۔ سردار محمد یوسف تے سینیٹر طلحہ محمود نے اسلام آباد وچ پریس کانفرنس کردیاں صوبہ ہزارہ دے قیام دے مطالبے دی حمایت دا اعادہ کیتا اے۔ اوہناں نے کہیا کہ صوبہ ہزارہ دی تحریک 2010 وچ شروع ہوئی تے ایہ کسے اک سیاسی جماعت دی نہیں سگوں سارے مکاتبِ فکر تے لوکاں دی متفقہ آواز اے۔ سردار محمد یوسف نے کہیا کہ صوبہ ہزارہ دے قیام تے ساریاں سیاسی جماعتاں متفق نیں، جدوں کہ خیبر پختونخوا اسمبلی 2014، 2018 تے 2020 وچ صوبہ ہزارہ دے حق وچ آئینی قرارداداں منظور کر چکی اے۔
اوہناں نے کہیا کہ قومی اسمبلی تے سینیٹ وچ وی صوبہ ہزارہ دے قیام لئی بل پیش کیتے جا چکے نیں، جیہڑے قانون تے انصاف دیاں قائمہ کمیٹیاں نوں گھلے گئے نیں۔ وفاقی وزیر نے کہیا کہ 2010 دی تحریک وچ ہزارہ دے ست نوجوان جان گوا بیٹھے تے اوس ویلے ساریاں سیاسی وابستگیاں توں بالاتر ہو کے اکو ای مطالبہ سی کہ صوبہ ہزارہ بنایا جائے، اوہناں دا کہنا سی کہ انتظامی طور تے نویں صوبے تے یونٹس ویلے دی لوڑ نیں۔ سینیٹر طلحہ محمود نے کہیا کہ ملکی مسلیاں دا حل نویں صوبیاں دے قیام وچ اے تے نویں صوبے بنن نال معیشت وچ بہتری آئے گی، اوہناں نے کہیا کہ جنوبی پنجاب سنے دوجیاں صوبائی تحریکاں دے رہنما وی نویں صوبیاں دے قیام دے حوالے نال آواز چکدے رہے نیں۔
