مظفرآباد: 2 حلقیاں وچ اج پولنگ، سخت سکیورٹی، فوج تعینات

ایل اے 28 دے 54 پولنگ سٹیشناں، ایل اے 27 وچ پولنگ دیاں تیاریاں مکمل، ڈویژن دیاں 7 نشستاں دے نتائج دا اعلان، ٹرن آؤٹ 54 فیصد رہیا، چیف الیکشن کمشنر

اسلام آباد (محمد اسلم میر توں) چیف الیکشن کمشنر آزاد کشمیر جسٹس (ر) غلام مصطفیٰ مغل نے کہیا اے کہ مظفرآباد وچ ٹرن آؤٹ دی شرح 54 فیصد رہی، مظفرآباد ڈویژن دیاں 7 نشستاں دے نتائج دا اعلان کردیاں اوہناں نے کہیا کہ ایل اے 25 توں شاہ غلام قادر، ایل اے 26 توں پیپلز پارٹی دے میاں وحید، ایل اے 29 توں پیپلز پارٹی دے سردار مختار خان، ایل اے 30 توں مسلم لیگ (ن) دے مصطفیٰ بشیر، ایل اے 31 توں راجہ ثاقب مجید، ایل اے 32 توں مسلم لیگ دے راجہ فاروق حیدر خان، ایل اے 33 توں دیوان علی خان چغتائی کامیاب قرار پائے نیں۔

چیف الیکشن کمشنر نے کہیا کہ جے 2 یا 4 نشستاں نہیں نیں تاں ایہ نہیں کہیا جا سکدا کہ اسمبلی مکمل نہیں، لوک حلف نہیں چک سکدے، اوہناں نے کہیا کہ حلقہ ایل اے 28 دے 54 پولنگ سٹیشناں تے حلقہ ایل اے 27 مظفرآباد 1 وچ اج پولنگ ہوئے گی، اوہناں نے کہیا کہ لوکاں نے تشدد دا راہ چھڈ کے ووٹ دی طاقت دا راہ اپنایا۔ ایس توں علاوہ آزاد جموں و کشمیر وچ دو مرحلیاں وچ کروائے گئے عام انتخابات وچ مسلم لیگ (ن) نے مجموعی طور تے 23 نشستاں حاصل کر لئیاں نیں جد کہ پاکستان پیپلز پارٹی 9 نشستاں نال دوجے نمبر تے اے۔