میزائلاں دا ذخیرہ تقریباً ختم، امریکہ ایران توں ڈیل لئی بے چین
آرمی ٹیکٹیکل میزائل سسٹم، پریسیژن سٹرائیک میزائل، پیٹریاٹ تے تھاڈ میزائل دی کمی نال چین روس نال ممکنہ ٹکراؤ وِچ عسکری تیاری متاثر ہو سکدی، صدر ٹرمپ دی تردید، مذاکرات وِچ پیش رفت، اج معاہدہ طے پا سکدا: امریکی وزرا، تیل دیاں قیمتاں 3 ہفتیاں دی گھٹ ترین سطح تے پہنچ گیاں، حوثیاں دا سعودی ایئرپورٹ تے حملہ، یمن دے نیڑے بھارتی جہاز ڈب گیا۔
واشنگٹن (نیوز ایجنسیاں) امریکہ نے ایران نال پچھلے 5 مہینیاں توں جاری جنگ دے دوران اپنے دور مار تے ٹھیک نشانہ بنان والے میزائلاں دے ذخیریاں دا وڈا حصہ استعمال کر لیا اے۔ ذرائع دے مطابق امریکی فوج اپنے زمین توں زمین تے مار کرن والے اہم میزائلاں—ATACMS (آرمی ٹیکٹیکل میزائل سسٹم) تے PrSM (پریسیژن سٹرائیک میزائل)—دا تقریباً سارا ذخیرہ استعمال کر چکی اے۔ امریکی اہلکاراں نوں تشویش اے کہ ایہناں ذخیریاں دے ختم ہون نال چین یا روس ورگے دوجے حریفاں دے خلاف مستقبل دے ممکنہ ٹکراؤ وِچ امریکہ دی عسکری صلاحیت تے تیاری متاثر ہو سکدی اے۔ رپورٹ وِچ ایہہ وی دَسیا گیا اے کہ دفاعی میزائل جِداں Patriot سسٹمز (65% تک استعمال) تے THAAD انٹرسیپٹرز دے ذخیریاں وِچ وی قابل ذکر کمی آئی اے۔ ایہدے توں علاوہ امریکہ اپنے ٹوما ہاک کروز میزائلاں دا وی تقریباً اَدھا ذخیرہ استعمال کر چکا اے۔ صدر ڈونلڈ ٹرمپ تے وائٹ ہاؤس نے ایہناں خبراں تے خدشیاں نوں رد کردے ہوئے کہیا اے کہ امریکہ کول دنیا وِچ سبھ توں زیادہ تے لوڑ توں کدرے زیادہ دفاعی سامان موجود اے تے دفاعی کمپنیاں ریکارڈ سطح تے پیداوار ودھا رہیاں نیں۔
دوجے پاسے منگل نوں تیل دیاں قیمتاں اس وقت ترے ہفتیاں دی گھٹ ترین سطح تے پہنچ گیاں جدوں امریکی اہلکاراں دے بیانات نے اس امید نوں مضبوط کیتا کہ آبنائے ہرمز نوں دوبارہ کھولن لئی ایران نال کسی معاہدے تے پہنچیا جا سکدا اے۔ امریکی وزیر خارجہ مارکو روبیو تے وزیر خزانہ سکاٹ بیسنٹ دوہاں نے اعلان کیتا کہ مذاکرات وِچ اینی پیش رفت ہوئی اے کہ جہاز رانی دا سلسلہ ممکنہ طور تے اسی ہفتے دوبارہ شروع ہو سکدا اے۔ بحری رسد وِچ رکاوٹ گھٹ ہون دے امکان نال جڑی خبراں توں بعد عالمی مارکیٹ وِچ برینٹ خام تیل دی فی بیرل قیمت تقریباً 5 فیصد گھٹ ہو کے 80 ڈالر توں تھلے آ گئی۔ امریکی وزیر خارجہ مارکو روبیو دا کہنا اے کہ ایران تے عمان نال آبنائے ہرمز توں ہور جہازاں دی آؤ جاؤ ممکن بنان دے حوالے نال ہون والی گل بات وِچ پیش رفت ہوئی اے۔ اوہناں نے محکمۂ خارجہ وِچ صحافیاں نال گل بات کردے ہوئے کہیا ایہناں مذاکرات وِچ بھاویں پیش رفت ہوئی اے پر اجے کوئی حتمی معاہدہ نہیں ہویا۔ سانوں امید اے کہ ایہہ بہت جلدی ہو جائے گا۔ دوجی طرف امریکی وزیر خزانہ سکاٹ بیسنٹ نے کہیا کہ آبنائے ہرمز نوں دوبارہ کھولن نال متعلق معاہدہ بدھ تک طے پا سکدا اے۔ مزید ایہہ کہ یمن دے ایران نواز حوثی باغیاں ولوں ڈرون حملے توں بعد سعودی عرب دے نجران ایئرپورٹ نوں بند کر دِتا گیا۔
حوثی عسکری ترجمان یحییٰ سریع دے مطابق ڈرون حملے وِچ ایئرپورٹ دے ایک حساس حصے نوں کامیابی نال نشانہ بنایا گیا۔ ذرائع دے مطابق ڈرون لگن نال ایئرپورٹ دا بنیادی راڈار تباہ ہویا، جس دی وجہ توں پروازاں دی آؤ جاؤ متاثر ہوئی۔ سعودی اہلکاراں ولوں اس دعوے تے واقعے تے فی الحال کوئی باضابطہ رد عمل سامنے نہیں آیا۔ ایک بھارتی مال بردار جہاز یمن دے مغربی ساحل دے نیڑے بحیرۂ احمر وِچ بارودی کشتی نال ٹکرا گیا جس نال زوردار دھماکا ہویا تے اگ بھڑک اٹھی، اس مبینہ حملے وِچ بھارتی جہاز نوں شدید نقصان پہنچیا، تاہم کسی جانی نقصان دی اطلاع موصول نہیں ہوئی۔ جہاز نوں محفوظ تھاں تک پہنچان دیاں کوشلاں کیتیاں گیاں تاہم اوہ سمندر وِچ ڈب گیا۔ یمن دے ساحلی شہر مخا دے اہلکار دے مطابق ایم ایس وی فائز نورِ اولیا نامی جہاز دا عملہ، جس وِچ 13 بھارتی تے ایک یمنی شہری شامل سن، بندرگاہی شہر حدیدہ دے دکھن وِچ حملے دا نشانہ بنن توں بعد بحفاظت بچا لیا گیا۔ نئی دہلی نے اس حملے نوں بنا کسے بھڑکاہٹ دے جارحیت قرار دندے ہوئے ایہدی شدید مذمت کیتی اے۔ بھارتی وزیر سربانند سونووال نے دَسیا کہ جہاز یمنی سمندری حدود دے نیڑے ایک گولہ یا میزائل لگن نال متاثر ہویا۔
