دہشتگردی، انتہاپسندی دے خلاف پنجاب پولیس دیاں قربانیاں ناقابلِ فراموش: مریم نواز

پولیس شہداء دی وجہ توں لاہور دنیا دے محفوظ شہران وِچ شامل، کئی ترقی یافتہ شہر پچھے رہ گئے، پولیس نوں بہترین اسلحہ، مواصلاتی آلات دیاں گے، پیغام، خوشاب دے ایم پی ایز دی ملاقات

لاہور (سٹاف رپورٹر) وزیراعلیٰ پنجاب مریم نواز شریف نے یومِ شہدائے پولیس تے ملک و قوم لئی جانان دا نذرانہ پیش کرن والے پولیس شہدا نوں خراجِ عقیدت تے پولیس شہدا دے اہل خانہ دے صبر و حوصلے نوں سلام پیش کیتا، یومِ شہدائے پولیس تے اپنے پیغام وِچ وزیراعلیٰ نے کہیا کہ دہشت گردی، انتہاپسندی تے جرائم دے خلاف جدوجہد وِچ پنجاب پولیس دیاں قربانیاں ناقابلِ فراموش نیں، پنجاب پولیس دے ہر افسر تے جوان نے قیامِ امن لئی غیر متزلزل عزم دا مظاہرہ کیتا، عوام دے جان و مال دے تحفظ تے قیامِ امن لئی پولیس کلیدی کردار ادا کر رہی اے، وزیراعلیٰ نے کہیا کہ قوم محفوظ مستقبل دی راہ ہموار کرن لئی ہراول دستے دا کردار ادا کرن والیاں نوں سلام پیش کردی اے، پنجاب حکومت پولیس شہدا دے ورثا دی فلاح و بہبود تے دیکھ بھال دیاں ذمہ داریاں بطریقِ احسن ادا کر رہی اے، اوہناں دے بالاں دی صحت، معیاری تعلیم، رہائش سمیت دوجیاں ترے ساریاں سہولتاں حکومتِ پنجاب دی ذمہ داری نیں، سیف سٹی پراجیکٹ تے پولیس شہداء دیاں قربانیاں دی وجہ توں لاہور دنیا دے محفوظ شہران وِچ شامل ہو چکا اے۔

پنجاب پولیس دیاں کوشلاں نال نمبیو (Numbeo) کرائم اینڈ سیفٹی انڈیکس وِچ لاہور نے کئی ترقی یافتہ شہران نوں پچھے چھڈ دِتا، پنجاب پولیس نوں بہترین اسلحہ، جدید ترین حفاظتی تے مواصلاتی آلات، بلٹ پروف گاڈیاں تے دوجیاں لوڑاں مہیا کیتیاں جا رہیاں نیں، پولیس شہداء دیاں قربانیاں رنگ لے آئیاں تے اج کچے دا علاقہ نہ صرف محفوظ اے بلکہ ترقی دی راہ تے گامزن اے، ایسے دوران وزیراعلیٰ نال خوشاب دے ارکانِ صوبائی اسمبلی آصف ملک تے ظفر عباس خان نے ملاقات کیتی، ملاقات وِچ ملکی سیاسی امور، ترقیاتی پراجیکٹس تے حلقے دے مسائل تے گل بات کیتی گئی، ارکانِ صوبائی اسمبلی نے وزیراعلیٰ نوں خوشاب دے مسائل توں آگاہ کیتا، وزیراعلیٰ نے عوامی مسائل دے حل دی یقین دہانی کرائی۔ ارکانِ صوبائی اسمبلی نے وزیراعلیٰ مریم نواز شریف نوں آزاد جموں و کشمیر وِچ عوام دا بھرپور اعتماد حاصل کرن تے مبارکباد دتی تے خوشاب وِچ الیکٹرک بس سروس دے آغاز تے شکریہ ادا کیتا، وزیراعلیٰ نے کہیا کہ مسلم لیگ (ن) پنجاب سمیت پورے ملک تے آزاد کشمیر دی مقبول ترین عوامی جماعت اے، قائد نواز شریف دی قیادت وِچ پنجاب تے ملک نوں اگے لے کے جاواں گے، اج سارے صوبیاں توں اک ہی آواز آؤندی اے کہ پنجاب امن و امان سمیت ہر شعبے وِچ سبھ توں بہتر اے۔