وفاقی ملازمین دے 24-2023 دے ایڈہاک الاؤنسز منجمد
نویں وفاقی ملازمین نوں وی ایڈہاک ریلیف الاؤنس بنیادی پے سکیل 2022 دے مطابق ملے گا، خصوصی تنخواہواں تے دوجے متعلقہ الاؤنسز وی 30 جون 2026 دی سطح تے منجمد رہن گے
اسلام آباد (ایس ایم زمان) وفاقی حکومت نے بنیادی پے سکیل 2026 دے نفاذ توں بعد ایڈہاک ریلیف الاؤنس 2023 تے 2024 دے حوالے نال نویاں پالیسی ہدایات جاری کر دِتیاں نیں۔ وزارتِ خزانہ دے مطابق وفاقی ملازمین نوں ملن والیاں خصوصی تنخواہواں، خصوصی الاؤنسز تے بنیادی تنخواہ نال منسلک دوجے الاؤنسز 30 جون 2026 دی سطح تے منجمد رہن گے۔ وزارت دے مطابق ایڈہاک ریلیف الاؤنس 2023 نوں 30 جون 2023 دی سطح تے منجمد رکھیا گیا اے تاہم یکم جولائی 2026 توں وفاقی حکومت وِچ نویں بھرتی ہوون والے ملازمین وی اس الاؤنس دے مستحق ہوون گے۔ ایہہ الاؤنس بنیادی پے سکیل 2022 دی گھٹ توں گھٹ بنیادی تنخواہ دی بنیاد تے ادا کیتا جائے گا۔ ایہدے تحت گریڈ 1 توں 16 تک دے ملازمین نوں بنیادی تنخواہ دا 35 فیصد جبکہ گریڈ 17 توں 22 تک دے ملازمین نوں 30 فیصد ایڈہاک ریلیف الاؤنس 2023 دِتا جائے گا جو اگلاں احکامات تک اسی شرح تے منجمد رہے گا۔
وزارتِ خزانہ نے ہور دَسیا کہ ایڈہاک ریلیف الاؤنس 2024 وی بنیادی پے سکیل 2022 دی بنیاد تے ادا کیتا جائے گا۔ ایہدے تحت گریڈ 1 توں 16 تک دے ملازمین نوں بنیادی تنخواہ دا 25 فیصد جبکہ گریڈ 17 توں 22 تک دے ملازمین نوں 20 فیصد الاؤنس ملے گا۔ ایہہ الاؤنس وی 30 جون 2026 دی سطح تے منجمد رہے گا۔ یکم جولائی 2026 توں وفاقی حکومت وِچ نویں تقرری پاؤندے ملازمین نوں وی ایڈہاک ریلیف الاؤنس 2024 بنیادی پے سکیل 2022 دی گھٹ توں گھٹ بنیادی تنخواہ دے مطابق دِتا جائے گا۔ نویں ملازمین لئی وی گریڈ 1 توں 16 تک 25 فیصد تے گریڈ 17 توں 22 تک 20 فیصد الاؤنس مقرر کیتا گیا اے، جو اگلاں احکامات تک اسی سطح تے برقرار تے منجمد رہے گا۔
