پاک امریکہ تجارتی گل بات، تکنیکی معاملیاں نوں نبھیڑن اُتے اتفاق

محمد اورنگزیب دی امریکی تجارتی نمائندے جیمیسن گریئر نال آن لائن ملاقات، تجارتی ساجھا، پاکستانی برآمدات اُتے بنی معاشی ترقی دی حکمت عملی لئی ضروری: وزیر خزانہ

اسلام آباد (نیوز ایجنسیاں) وفاقی وزیر خزانہ سینیٹر محمد اورنگزیب نے امریکی تجارتی نمائندے جیمیسن گریئر نال آن لائن ملاقات کیتی، جِس وچ پاک امریکہ تجارتی گل بات وچ ہون آلے کماں دا جائزہ لیا گیا تے باقی معاملیاں نوں تکنیکی پدھر اُتے چھیتی حل کرن اُتے اتفاق کیتا گیا۔ ملاقات دوران وزیر خزانہ محمد اورنگزیب نے گل بات وچ ہون آلے کماں اُتے خوشی دا اظہار کردیاں ہوئیاں آکھیا کہ امریکہ نال مضبوط تجارتی تے سرمایہ کاری ساجھا داری پاکستان دی وڈی لوڑ اے، دوویں دیساں وچکار تجارتی ساجھا پاکستان دی برآمدات اُتے بنی معاشی ترقی دی حکمت عملی لئی بہت اہم اے۔

فریقین نے گل بات دی رفتار رکھن، تکنیکی پدھر اُتے گل بات تیز کرن تے تجارتی فریم ورک نوں چھیتی پورا کرن لئی نیڑے دا رابطہ رکھن اُتے وی اتفاق کیتا۔ وزیر خزانہ نے ایس موقعے اُتے پاکستان تے امریکی ایکسپورٹ امپورٹ بینک وچکار ساجھا رکھن دی لوڑ اُتے زور دیاں ہوئیاں آکھیا کہ پاک امریکہ اقتصادی ساجھا نال دوویں دیساں دے وپاریاں لئی ہور تجارتی تے سرمایہ کاری دے موقعے بنن گے۔ امریکی تجارتی نمائندے جیمیسن گریئر نے گل بات وچ پاکستان دے لگاتار ساتھ نوں سراہندیاں ہوئیاں مزدور تے قانونی سُਧاراں وچ ترقی نوں ودھیا قرار دتا تے جبری مزدوری نال جڑے قانۆناں اُتے چنگا عمل کرن لئی پاکستان دے کماں دی وی تعریف کیتی۔