فیلڈ مارشل عاصم منیر نال صومالی وزیرِ دفاع دی ملاقات، دفاعی تعاون ودھان اتے اتفاق
صومالیہ دے اچی پدھر دے وفد دا جی ایچ کیو دا دورہ، آپسی دلچسپی دے امور تے علاقائی سلامتی دی صورتحال اتے وچار وٹاندرا۔ فوجی تعلقات وچ وادھے تے سکیورٹی چیلنجز نال نبٹن دی گنجائش بہتر بنان دی اہمیت اتے زور دتا گیا: آئی ایس پی آر
راولپنڈی فیلڈ مارشل سید عاصم منیر نال صومالیہ دے وزیرِ دفاع نے ملاقات کیتی جیندے وچ دفاعی تعاون ودھان اتے اتفاق کیتا گیا۔ آئی ایس پی آر دے مطابق صومالیہ دے اچی پدھر دے وفد نے جی ایچ کیو دا دورہ کیتا، وفد دی اواݨی صومالیہ دے وزیرِ دفاع نے کیتی۔ وفد نے آرمی چیف، چیف آف دفاعی فورسز، فیلڈ مارشل سید عاصم منیر نال ملاقات کیتی، ملاقات وچ آپسی دلچسپی دے امور تے علاقائی سلامتی دی صورتحال اتے وچار وٹاندرا کیتا گیا۔
آئی ایس پی آر دے مطابق ملاقات دے دوران دوطرفہ دفاعی تے سلامتی تعاون ودھان دے اپرالے اتے وچار وٹاندرا کیتا گیا۔ پاک فوج دے شعبہ تعلقات عامہ دے مطابق ملاقات وچ فوجی تعلقات وچ وادھے تے سکیورٹی چیلنجز نال نبٹن دی قابلیت بہتر بنان دی اہمیت اتے زور دتا گیا۔ صومالی وزیرِ دفاع نے پاکستان دی پکی حمایت تے خطے وچ امن و استحکام لئی پاکستان دی مسلح فوجاں دے پیشہ ورانہ کردار دی تعریف کیتی۔ فیلڈ مارشل سید عاصم منیر نے صومالیہ دے سکیورٹی نظام نوں مضبوط بنان تے خطے وچ پکے امن لئی پورے تعاون دے عزم دا اعادہ کیتا۔
