نویں صوبیاں کیتے اٹھݨ آلے ہر تحریک دا حصہ ویسوں، مصطفیٰ کمال
کراچی ایم کیو ایم پاکستان دے رہنما تے وفاقی وزیر صحت مصطفیٰ کمال آکھیا اے جو نویں صوبیاں کیتے اٹھݨ آلے ہر تحریک دا حصّہ بݨیسوں۔
سرجانی ٹاؤن وچ ایم کیو ایم دے جلسے توں خطاب کریندے ہوئیں مصطفیٰ کمال دا آکھݨ ہئی جو پاکستان دی آبادی 24 کروڑ توں ودھ چکی اے پر ملک وچ اڄ وی صرف 4 صوبے نیں، نویں انتظامی یونٹس بݨاوݨ ناگزیر تھی چکیا اے۔ انہاں آکھیا جو ایم کیو ایم اختیار نچلی سطح توں تئیں منتقل کرݨ کیتے آئینی مسودہ تے ایجنڈا پیش کیتا، پر پیپلز پارٹی ایندی حمایت نہیں کیتی، 26 ویں تے 27 ویں آئینی ترامیم وچ وی انہاں دی ڳالھ نہیں منی گئی۔ وفاقی وزیر دا آکھݨ ہئی جو ہݨ ایم کیو ایم انتظامی یونٹس دے قیام دی تحریک دا ہراول دستہ بݨسی تے نویں صوبیاں کیتے اٹھݨ آلے ہر تحریک دا حصّہ بݨسی، ملک وچ کہیں نویں حد بندی دی ضرورت نہیں، موجودہ ڈویژناں نوں صوبیاں دا درجہ ݙتا وڄے۔
مصطفیٰ کمال آکھیا جو پورے ملک وچ 33 صوبے ہووݨ چاہیدے نیں، اسلام آباد نوں وی صوبے دا درجہ ݙتا وڄے، پنجاب وچ 10 تے بلوچستان وچ 8 ڈویژنز نیں، جد کہ ٻئے صوبیاں دے ڈویژنز نوں وی انتظامی یونٹس وچ تبدیل کیتا ون٘دا سڳدا اے۔ انہاں دا آکھݨ ہئی جو وفاق نے 8 ہزار 884 ارب روپے صوبیاں دے حوالے کیتے، پر اے رقم 4 وزرائے اعلیٰ کول چلی گئی، سندھ دے لوکاں نوں پئے دا صاف پانی تک میسر نہیں، کراچی دے ٻال گٹریں وچ گر کے فوت تھیندے پئے نیں۔
وفاقی وزیر آکھیا جو سندھ دے لوکاں نوں کہیں صوبے دا ہک انچ وی ݙیوݨ دی ضرورت نہیں، مسئلہ انتظامی نظام دا اے، اڄ ملک چار وزرائے اعلیٰ چلیندے پئے نیں، انہاں نوں خوف ہووݨ چاہیدا اے جو جے او کم نہیں کریسن تاں لوک انہاں نوں ووٹ نہیں ݙیسن۔
