مریم نواز نال قائم مقام امریکی سفیر دی ملاقات، اے آئی تے انرجی شعبیاں وِچ تعاون تے اتفاق

پنجاب وِچ ہَڑھ (سیلاب) تے سموگ نال نمٹن لئی امریکی ماہرین (ایکسپرٹس) دیاں خدمات لئیاں جان گیاں، تبادلہ خیال: پنجاب تے لاہور دے لوک زندہ دل نیں، محفوظ بسنت تے سوانیاں (خواتین) لئی پراجیکٹاں تے خراجِ تحسین: نیٹلی بیکر

لاہور (نیوز ایجنسیاں، مانیٹرنگ ڈیسک) وزیرِ اعلیٰ پنجاب مریم نواز شریف نال قائم مقام امریکی سفیر نیٹلی بیکر نے ملاقات کیتی جیہناں دا پرتپاک خیرمقدم کیتا گیا۔ ملاقات وِچ پنجاب وِچ تعلیم دے ودھاء، سکیورٹی تے سرمایہ کاری بارے تبادلہ خیال کیتا گیا۔ قائم مقام امریکی سفیر نیٹلی بیکر نے وزیرِ اعلیٰ مریم نواز نوں سوانیاں لئی پراجیکٹاں تے خراجِ تحسین پیش کیتا۔ ملاقات وِچ سکیورٹی، آرٹیفیشل انٹیلی جنس (اے آئی)، ڈیجیٹل اثاثیاں تے انرجی ورگے شعبیاں وِچ تعاون تے اتفاق کیتا گیا۔ ایس موقعے تے پنجاب وِچ ہَڑھ تے سموگ توں بچن لئی امریکی ایکسپرٹ دیاں خدمات حاصل کرن تے وی اتفاق کیتا گیا۔ لاہور وِچ پنجاب یو ایس بزنس اینڈ انویسٹمنٹ فورم دے انعقاد دی تجویز دا جائزہ لیا گیا۔ قائم مقام امریکی سفیر نیٹلی بیکر نے لاہور وِچ بسنت فیسٹیول دے انعقاد نوں سراہندیاں محفوظ بسنت لئی حکومتِ پنجاب دے اقدامات نوں خراجِ تحسین پیش کیتا تے آکھیا کہ پاکستان بہت پسند اے، بالخصوص پنجاب تے لاہور دے لوک زندہ دل نیں۔

مریم نواز شریف نے آکھیا کہ آؤندے سال بسنت میلے نوں مزید وسعت دیاں گے۔ پنجاب وِچ سوانیاں نوں بااختیار بنان لئی قانونی اقدامات کر رہے آں۔ پنجاب وِچ ترقی، ماحولیاتی تبدیلیاں دی پالیسی بنا رہے آں۔ امریکہ وِچ مقیم 10 لکھ پنجاب دے اوورسیز پاکستانی مُلک دا قابلِ قدر اثاثہ نیں۔ مون سون وِچ پہلے توں کیتے گئے اقدامات تے ڈسٹرکٹ واساز دے قیام نال میہہ (بارش) دے پانی دے جلدی نکاس نوں ممکن بنایا گیا۔ پنجاب بدل رہا اے، پنجاب دے شہر تے پنڈ ری فارم ہو رہے نیں۔ پاکستان دی پہلی زنانی (خاتون) وزیرِ اعلیٰ ہون دی حیثیت نال ویمن ایمپاورمنٹ نوں محض علامتی نہیں عملی شکل دتی۔ پنجاب وِچ سوانیاں دی آمدورفت وِچ آسانی لئی الیکٹرک سکوٹی تے الیکٹرک بس سروس شروع کیتی گئی اے۔ سوانیاں نوں مالی خود مختاری دی راہ تے گامزن کرن لئی چھوٹے کاروبار (سمال بزنس) لئی بغیر سود توں قرضے دتے جا رہے نیں۔

سوانیاں دے تحفّظ لئی ڈائریکٹ پنک بٹن تے ورچوئل پولیس سٹیشن پہلا اقدام اے۔ ایہدے توں علاوہ وزیرِ اعلیٰ مریم نواز نے بہاولپور سمیت پنجاب دے 30 ہزار ایکڑ تے شرمپ فارمنگ (جھینگا پالن) دا پلان تیار کرن دی اصولی منظوری دے دتی۔ اک اجلاس وِچ مظفر گڑھ وِچ کامیاب تجربیاں توں بعد سرگودھا وِچ وی شرمپ فارمنگ دے جدید ٹیکنالوجی نال آغاز دا عمل تیز کرن دی ہدایت وی کیتی۔ وزیرِ اعلیٰ نے آکھیا کہ پنجاب وِچ بنجر زمین شرمپ ایکسپورٹ دا مرکز بنے گی، پنجاب ویلیو چین قائم ہون توں بعد شرمپ ایکسپورٹ وِچ لیڈ کرے گا، جیہدے نال مقامی فوڈ انڈسٹری وِچ مقامی شرمپ دی امپورٹ تے خرچ ہون والا قیمتی زرمبادلہ بچے گا۔ وزیرِ اعلیٰ نے ہدایت کیتی کہ شرمپ فارمنگ پروجیکٹ وِچ مرحلہ وار پرائیویٹ سیکٹر نوں وی شامل کیتا جاوے۔ اجلاس وِچ وزیرِ اعلیٰ نوں کاہنہ فش مارکیٹ تے وی بریفنگ دتی گئی۔ ایہدے توں علاوہ وزیرِ اعلیٰ نے یوتھ دے عالمی دہاڑے (دن) تے نوجواناں نوں درپیش سارے مسئلے حل کرن تے ایہناں نوں تعلیم یافتہ تے ہنرمند بنان دے عزم دا اعادہ کردیاں ہوئیاں نوجواناں نوں مُلک نال محبت کرن تے گالی گلوچ دی سیاست توں ہمیشہ دور رہن دی تلقین کیتی تے جسمانی و ذہنی صحت لئی نشے ورگی لعنت توں دور رہن دی اپیل وی کیتی۔