انڈیا، اتراکھنڈ زیرِ تعمیر سرنگ وچ حادثہ، 7 مزدور ہلاک

مزدور سرکاری ہائیڈرو پاور منصوبے لئی سرنگ دی تعمیر وچ مصروف سن۔

لاہور (اے ایف پی) انڈیا دے شمالی علاقے وچ زیرِ تعمیر سرنگ وچ لینڈ سلائیڈنگ دے باعث پانی تے ملبہ داخل ہون نال کم از کم 7 مزدور ہلاک تے 13 زخمی ہو گئے۔ خبر رساں ادارے اے ایف پی دے مطابق حکام نے جمعے نوں بتایا کہ ایہ حادثہ جمعرات دی رات ہمالیائی ریاست اتراکھنڈ وچ پیش آیا، جتھے مزدور سرکاری ہائیڈرو پاور منصوبے لئی سرنگ دی تعمیر وچ مصروف سن۔ ریاستی ڈیزاسٹر مینجمنٹ اتھارٹی دے مطابق کم از کم 3 مزدور ہن بھی لاپتہ نے، جبکہ 19 افراد نوں ریسکیو کر لیا گیا اے۔ ایہ حادثہ ٹیہری ہائیڈرو ڈویلپمنٹ کارپوریشن دے منصوبے تے پیش آیا۔ اتراکھنڈ وچ گزشتہ چند دناں توں شدید مون سون بارشاں جاری نے۔ انڈیا وچ بڑے تعمیراتی منصوبیاں تے حادثات عام نے، تاہم ماہرینِ ماحولیات دا کہنا اے کہ ہمالیائی خطے وچ ضرورت توں زیادہ ترقیاتی منصوبیاں نے قدرتی آفات دے خطرے وچ اضافہ کیتا اے۔