14 اگست، ایمان، آزادی، قومی عزم دی علامت: چیئرمین سینیٹ

پنجاب، سندھ، پختونخوا، بلوچستان، جی بی، آزاد کشمیر پاکستان دے اتحاد دے رنگ؛ درپیش چیلنجز تے قابو پاؤن لئی قومی اتحاد ناگزیر: یوسف رضا گیلانی، تقریب توں خطاب

اسلام آباد (اپنے رپورٹر سے) چیئرمین سینیٹ سید یوسف رضا گیلانی نے کہا اے کہ 14 اگست محض کیلنڈر دی اک تاریخ نہیں بلکہ ایمان، آزادی، خودمختاری، جمہوریت تے قومی عزم دی علامت اے۔ ایہہ دن سانوں اس تاریخی جدوجہد تے عظیم قربانیاں دی یاد دواؤندا اے جنہاں دے نتیجے وچ قائدِ اعظم محمد علی جناحؒ دی قیادت وچ پاکستان معرضِ وجود وچ آیا۔

اسلام آباد دے کنونشن سینٹر وچ منعقدہ قومی یومِ آزادی دی تقریب توں خطاب کردے ہوئے انہاں نے قوم نوں یومِ آزادی دی مبارکباد پیش کیتی تے تحریکِ پاکستان دے بانیان، قائدین، کارکنان، مسلح افواج تے قانون نافذ کرن والے اداریاں دے شہدا نوں بھی زبردست خراجِ عقیدت پیش کیتا۔ چیئرمین سینیٹ نے کہا کہ صدرِ مملکت آصف علی زرداری، وزیراعظم محمد شہباز شریف تے چیف آف ڈیفنس فورسز فیلڈ مارشل سید عاصم منیر دی قیادت وچ پاکستان اپنے قومی مفادات دے تحفظ تے عالمی برادری وچ اک ذمہ دار ملک دی حیثیت نال اپنا کردار مضبوط بنا رہا اے۔ انہاں نے کہا مکہ دفاعی معاہدہ توں علاقائی تعاون، باہمی اعتماد تے اجتماعی سلامتی لئی نویاں راہاں کھلیاں نے۔

انہاں نے کہا پاکستان نوں اقتصادی دباؤ، بے روزگاری، توانائی و پانی دی قلت، موسمیاتی تبدیلی، دہشت گردی، صحت، تعلیم تے ادارہ جاتی اصلاحات سمیت پیچیدہ چیلنجز دا سامنا اے جنہاں تے قابو پاؤن لئی قومی اتحاد ناگزیر اے۔ چیئرمین سینیٹ نے تمام ملکاں، بالخصوص ہمسائے ملکاں دے نال پرامن، باعزت تے باہمی مفاد تے مبنی تعلقات لئی پاکستان دے عزم دا اعادہ کیتا۔ انہاں نے کشمیری عوام دے حقِ خودارادیت تے فلسطینی عوام دے جائز حقوق، بشمول اک آزاد تے خودمختار ریاست دے قیام دے حق لئی پاکستان دی مسلسل اخلاقی، سیاسی تے سفارتی حمایت دا بھی اعادہ کیتا۔

انہاں نے کہا قائدِ اعظم دا سنہری اصول “ایمان، اتحاد تے نظم و ضبط” محض قومی شعار نہیں بلکہ پاکستان دے مستقبل لئی اک عملی رہنما اصول بننا چاہیدا اے۔ قبل ازیں چیئرمین سینیٹ نے پاکستان دے 79ویں یومِ آزادی تے پاکستان مونومنٹ، اسلام آباد وچ منعقدہ پرچم کشائی دی تقریب وچ شرکت کیتی تے قومی پرچم لہرایا۔ انہاں نے کہا پنجاب، سندھ، خیبر پختونخوا، بلوچستان، گلگت بلتستان تے آزاد کشمیر پاکستان دے اتحاد دے رنگ نے، ملک دی متنوع زباناں، ثقافتاں تے روایتاں کمزوری نہیں بلکہ قومی طاقت نے۔