اقتصادی رابطہ کمیٹی: پٹرولیم ڈیلراں دا منافع ودھا کے 9 روپے 98 پیسے لٹر مقرر کرن دی منظوری، ہڑتال ملتوی

پیٹرولیم ڈیلراں دے اک گروپ دی ہڑتال دی دھمکی تے حکومت نے اجلاس سدھیا، ڈیلراں دا منافع ودھان دی منظوری دتی گئی؛ پیٹرول، ڈیزل تے ڈیلرز مارجن 1 روپیہ 34 پیسے فی لیٹر ودھیا، اس توں پہلاں مارجن 8 روپے 64 پیسے فی لیٹر سی

لاہور (مانیٹرنگ ڈیسک) وفاقی حکومت منافع ودھان لئی پیٹرولیم ڈیلراں دے دباؤ وچ آ گئی، پیٹرولیم ڈیلراں دے اک گروپ دی ہڑتال دی دھمکی تے حکومت نے ای سی سی اجلاس سدھ کے پیٹرولیم مصنوعات تے مارجن تے نظرِ ثانی دی منظوری دے دتی۔ وفاقی کابینہ دی اقتصادی رابطہ کمیٹی دا اجلاس ہویا، جس وچ پیٹرولیم مصنوعات تے ڈیلرز مارجن وچ اضافے دی منظوری دے دتی گئی۔

اجلاس وچ پیٹرول تے ہائی سپیڈ ڈیزل دے ڈیلرز مارجن تے تفصیلی غور کیتا گیا۔ پیٹرولیم ڈویژن دی طرفوں ڈیلرز مارجن وچ نظرِ ثانی دی سمری اجلاس وچ پیش کیتی گئی۔ ای سی سی نے پیٹرولیم مصنوعات دے ڈیلرز مارجن وچ نظرِ ثانی دی سمری دا تفصیلی جائزہ لین توں بعد مارجن ودھان دی منظوری دتی۔ پیٹرول تے ڈیزل تے ڈیلرز مارجن 9 روپے 98 پیسے فی لیٹر کر دتا گیا، اس توں پہلاں پیٹرول تے ڈیزل تے ڈیلرز مارجن 8 روپے 64 پیسے فی لیٹر سی۔ وائس چیئرمین آل پاکستان پیٹرول پمپس اونرز ایسوسی ایشن نعمان بٹ دا کہنا اے کہ ڈیلرز مارجن ودھان تے وزیراعظم تے وزیرِ پیٹرولیم دا شکریہ ادا کردا واں۔ اجلاس وچ وفاقی وزراء رانا تنویر حسین، علی پرویز ملک تے احد خان چیمہ شریک ہوئے، جبکہ متعلقہ وزارتاں دے وفاقی سیکرٹریز تے اعلیٰ حکام نے بھی شرکت کیتی۔

اس توں پہلاں وزیرِ پیٹرولیم دی طرفوں یقین دہانی توں بعد پاکستان پیٹرولیم ڈیلرز نے ہڑتال ملتوی کرن دا اعلان کیتا سی۔ اعلان مطابق اج ملک بھر وچ پیٹرول پمپ کھلے رہن گے۔ کراچی وچ پاکستان پیٹرولیم ڈیلرز ایسوسی ایشن دے چیئرمین ملک خدا بخش نے پریس کانفرنس کردے ہوئے اعلان کیتا کہ ملک بھر وچ پیٹرولیم ڈیلراں دی طرفوں کل ہون والی ہڑتال ملتوی کر دتی گئی اے۔ انہاں نے بتایا کہ وزیراعظم توں خصوصی منظوری لے کے وزیرِ پیٹرولیم نے پیٹرولیم ڈیلراں دا منافع مارجن اک روپیہ 34 پیسے ودھان دا عندیہ دتا، ملک خدا بخش دا کہنا سی کہ آئل مارکیٹنگ کمپنیاں دی طرفوں کوٹہ سسٹم ختم کرن لئی خصوصی کمیٹی بھی تشکیل دتی جا رہی اے۔

دوجی طرف پاکستان پیٹرولیم ڈیلرز ایسوسی ایشن دے نائب چیئرمین طارق حسن نے کہا کہ پیٹرولیم ڈیلراں نے حکومت توں منافع مارجن وچ 8 فیصد اضافے دا مطالبہ کیتا سی، جبکہ مہنگائی دی شرح نوں مدِ نظر رکھدے ہوئے اصولی طور تے منافع مارجن وچ 4 توں 5 فیصد اضافہ ہونا چاہیدا سی۔ انہاں نے بتایا کہ پیٹرولیم مصنوعات دیاں قیمتاں وچ روزانہ تبدیلی دے نظام نوں تبدیل کر کے ست دناں تک کیتا جا سکدا اے، تاہم حتمی فیصلہ وزیراعظم دی سمری توں بعد ای سی سی تے کابینہ کرے گی۔