نویں صوبے، پی پی، پی ٹی آئی نوں نال ملانا ہووے گا: نجم سیٹھی
اجے فیصلہ نہیں ہویا کہ صوبے ۳۳ ہونے چاہیدے نے، ۱۶، ۱۸ یا ۲۲ بنانے نے، ن لیگ نے لڑائی بند کرن دا فیصلہ کر لیا: ”اج دی گل سیٹھی دے نال“ وِچ گفتگو
لاہور (مانیٹرنگ ڈیسک) سینئر تجزیہ کار نجم سیٹھی نے کہیا اے کہ ن لیگ ولوں فیصلہ ہو گیا اے کہ ہن لڑائی جھگڑے بند کرئیے، پیپلز پارٹی نوں کہیا کہ تُسیں گلگت بلتستان چلاؤ، اسیں کشمیر چلانے آں، ہن اوہ بیان بازی نہیں ہووے گی جو پہلے ہو رہی سی، ن لیگ تے پیپلز پارٹی دوویں پچھے ہٹ جان گیاں، سیز فائر ہو جاوے گا، دنیا نیوز دے پروگرام ”اج دی گل سیٹھی دے نال“ وِچ گفتگو کردے ہوئے اُنہاں نے کہیا اے کہ قانون سازی، نویں صوبے، تے دوجے معاملیاں اُتے اِک پیج اُتے ہونا اوکھا لگ رہا اے کیونکہ ایہ ایہوجیہا ایشو اے جو ن لیگ تے پیپلز پارٹی دے درمیان نہیں، ن لیگ ہر شے اُتے رضا مند اے، پیپلز پارٹی دے ترائے چار ایشو نے، ایہ اسٹیبلشمنٹ نے حل کرنے نے، ایس وجہ توں محسن نقوی آ تے جا رہے نے، پیپلز پارٹی دا مسئلہ اے ۲۸ویں ترمیم، اوہدے اندر کیہ ہووے گا، کیہ نہیں ہووے گا، کس حد تک ۱۸ویں ترمیم نوں رول بیک کیتا جاوے گا، میں رانا ثناء اللہ دی ایس گل نال اتفاق کردا آں کہ نویں صوبیاں دی گل کابینہ وِچ نہیں ہوئی، پر محسن نقوی نے بیان دتا اے، میرا موقف سی کہ اُنہاں دی وزیراعظم، صدر زرداری نال گل ہو چکی سی، اوہدے بعد اُنہاں نے بیان دتا، ایس ویلے محسن نقوی توں کچھ مس انڈر سٹینڈنگ ہو گئی، کچھ ہور کہنا چاہندے سن، ایس لئی اُنہاں نے بعد وِچ وضاحت دتی، میں سمجھدا آں کہ اجے کوئی فیصلہ نہیں ہویا کہ صوبے کتنے ہونے نے، ۳۳ ہونے نے یا ۱۶، ۱۸ یا ۲۲ ہونے نے، اسٹیبلشمنٹ ایہوجیہا نہیں کردی، اوہ ریسرچ کردے نے، فیڈ بیک لیندے نے، ڈسکس کردے نے، ریویو کردے نے، پھر دیکھدے نے کہ عوامی رائے کیہ اے، اسٹیبلشمنٹ دی کوشش ہووے گی جے ایس قسم دی ترمیم لانی اے تاں ساری سیاسی جماعتاں تحریک انصاف سمیت آن بورڈ ہون، کیونکہ ایہ بہت وڈا ایشو اے، این ایف سی ایوارڈ، نویں صوبے، نویں سیٹ اپ اُتے پیپلز پارٹی، تحریک انصاف نوں نال لے کے چلنا ہووے گا، جے ایہناں دوواں توں بغیر کچھ کرن دی کوشش کراں گے تاں کئی مسائل پیدا ہو جان گے، میں سمجھدا آں کہ ایس اُتے ۶ مہینیاں توں زیادہ ویلا لگے گا۔
