کال سینٹر توں گرفتار ۴۰۰ غیر ملکیوں نوں اڈیالہ جیل منتقل کرن دا فیصلہ

پہلے مرحلے وِچ ویتنام دے ۲۵۰ شہری منتقل، دوجے اج اڈیالہ پہنچائے جان گے، غیر ملکیوں وِچ چینی، ویتنامی، ملائیشین، انڈونیشین شامل، ۱۵ دناں وِچ ملک بدر کیتا جائے گا

اسلام آباد (آن لائن) اسلام آباد وِچ کال سینٹر توں گرفتار کیتے گئے تقریباً ۴۰۰ غیر ملکی شہریاں نوں مرحلہ وار سب جیل توں اڈیالہ جیل منتقل کرن دا فیصلہ کیتا گیا اے۔ ذرائع دے مطابق غیر ملکی شہریاں وِچ چین، ویتنام، ملائشیا تے انڈونیشیا دے وسن والے شامل نے، جیہناں دے خلاف ایف آئی اے تے نیشنل سائبر کرائم انویسٹی گیشن ایجنسی وِچ وکھ وکھ مقدمے درج نے۔ پہلے مرحلے وِچ رات گئے تقریباً ۲۵۰ ویتنامی شہریاں نوں سخت سکیورٹی وِچ اڈیالہ جیل منتقل کیتا گیا جبکہ دوجے مرحلے وِچ باقی غیر ملکی شہریاں نوں اج اڈیالہ جیل منتقل کیتا جائے گا۔ ذرائع دا کہنا اے کہ منتقلی دے دوران اِک چینی زنانی تے ایف آئی اے اہلکاراں دے وچکار تلخ کلامی توں بعد جھڑپ وی ہوئی۔ واقعہ مبینہ طور اُتے موبائل فونز تے پاسپورٹ حوالے کرن دے مطالبے اُتے پیش آیا۔ صورتحال کشیدہ ہون اُتے پولیس تے ایف آئی اے دی مزید نفری وی موقعے اُتے سُدّی گئی۔ حکام نے نجی ہاؤسنگ سوسائٹی دے پلازہ نوں سب جیل قرار دین دا نوٹیفکیشن واپس لے لیا۔ لنگھے دہاڑے ایہناں غیر ملکیوں دے ویزے منسوخ کر کے خصوصی پرمٹ جاری کیتے گئے سن۔ ذرائع نے دسیا کہ سارے غیر ملکیوں نوں ملک بدر کرن لئی اڈیالہ جیل منتقل کیتا جا رہیا اے، ایہناں نوں ۱۵ دناں دے اندر پاکستان توں واپس گھل دتا جائے گا۔