مدارس دی رجسٹریشن تے بینک اکاؤنٹس دا مسئلہ حل کیتا جائے، طاہر اشرفی

اگر نیٹو بن سکدا اے تے یورپی یونین اکٹھی ہو سکدی اے تے اسلامی دنیا کیوں اکٹھی نہیں ہو سکدی، ساڈی کوشش ہووے گی کہ سارے اسلامی ملک مکہ معاہدے وِچ شامل ہون، کانفرنس توں خطاب

لاہور (این این آئی) پاکستان علماء کونسل دے چیئرمین حافظ طاہر محمود اشرفی نے کہیا کہ مدارس دی رجسٹریشن تے بینک اکاؤنٹس دا مسئلہ حل کیتا جائے۔ پاکستان وِچ مدارس دے ۱۵ بورڈز موجود نے، ۲۲ ہزار مدارس دی رجسٹریشن چیریٹی کمیشن دے ذریعے کیتی جائے تاکہ نواں نظام شروع کرن دی لوڑ نہ پوے، مدارس دے بینک اکاؤنٹس کھولن دی سہولت فراہم کیتی جائے تے بیرونِ ملک توں آؤن والے طالب علماں لئی وی ضروری سہولتاں پیدا کیتیاں جان، ساڈی کوشش ہووے گی کہ سارے اسلامی ملک مکہ معاہدے وِچ شامل ہون۔ اگر نیٹو بن سکدا اے تے یورپی یونین اکٹھی ہو سکدی اے تے اسلامی دنیا کیوں اکٹھی نہیں ہو سکدی۔

ماڈل ٹاؤن وِچ متحدہ مدارس کونسل پاکستان دے زیرِ اہتمام تحریکِ پاکستان توں استحکامِ پاکستان تیکر، علمائے کرام مدارس دا کردار و قومی رواداری دے موضوع اُتے کانفرنس توں خطاب کردے ہوئے اوہناں نے کہیا کہ مدارس دینِ اسلام تے پاکستان دی خدمت کر رہے نے، اج وی برملا کہندے آں اگر کسے مدرسے نال متعلق کہیا جائے کہ اوتھے انتہا پسندی یا دہشت گردی دی تربیت دتی جا رہی اے تے اوہنوں خود تالا لاواں گے۔ اوہناں نے کہیا کہ معاہدہ مکہ مکرمہ مسلم امہ دی وحدت تے اتحاد اے ایہنوں اگے ودھنا چاہیدا اے، معاہدہ مکہ مکرمہ دے بوہے سبھ لئی کھلے نے تاکہ اسرائیل نوں ناکام بنایا جائے۔