مکہ معاہدہ خوش آئند، ملکی سلامتی اُتے سمجھوتا نہیں ہووے گا: پرویز اشرف

آزاد کشمیر الیکشن بے ضابطگیاں دا جائزہ لیا جائے، عوامی مینڈیٹ دا احترام ضروری؛ پیپلز پارٹی جمہوری ادارے، عوامی حقوق تے ملکی سلامتی لئی اپنا کردار ادا کردی رہے گی

دولتالہ سابق وزیراعظم پاکستان تے پیپلز پارٹی دے سینئر رہنما راجہ پرویز اشرف نے کہیا کہ مکہ دفاعی معاہدہ تاریخی تے اہم پیش رفت اے جیہدے دور رس اثرات مرتب ہون گے، تاہم ملکی سلامتی تے دفاع اُتے کوئی سمجھوتا نہیں کیتا جا سکدا۔ اوہناں نے ایہہ بات دولتالہ وِچ حاجی راجہ فضل الرحمن دے آفس وِچ میڈیا نال گفتگو کردے ہوئے کہی۔

راجہ پرویز اشرف نے کہیا کہ پاکستان امن، استحکام تے امتِ مسلمہ دے اجتماعی مفادات لئی کردار ادا کردا رہے گا، پاک فوج بہادری، پیشہ ورانہ صلاحیت تے قربانیاں پاروں ممتاز مقام رکھدی اے، قوم نوں اپنی مسلح افواج اُتے مکمل اعتماد اے۔ حالیہ حالات وِچ پاکستان نے دشمن دے عزائم ناکام بنا کے اپنی دفاعی صلاحیت ثابت کیتی تے بھارت نوں پاکستانی صلاحیتاں دا اندازہ ہو چکا اے۔

آزاد کشمیر انتخابات دے حوالے نال اوہناں نے کہیا کہ پیپلز پارٹی نے اپنے تحفظات متعلقہ فورمز تک پہنچا دتے نے۔ انتخابی بے ضابطگیاں دیاں ٹھوس شکایتاں دا غیر جانبدارانہ جائزہ لیا جائے، کیونکہ عوامی مینڈیٹ تے ووٹ دا تقدس برقرار رہنا چاہیدا اے۔ ایس موقعے اُتے راجہ جاوید اشرف، سید قلب عباس، نمبردار ساجد جنجوعہ، راجہ قدیر، ملک خورشید احمد، راجہ وقار تے ہور وی موجود سن۔