بی ایل اے مذموم مقاصد لئی سوانیاں تے بالاں نوں نشانہ بنا رہی اے: بلوچ قیادت
کوئٹہ (دنیا نیوز) بلوچستان دیاں سیاست دان سوانیاں نے کہیا اے کہ بی ایل اے عام شہریاں، سوانیاں تے بالاں نوں نشانہ بنا رہی اے، دہشت گردی ختم کرنی ہوئے گی۔
ڈپٹی سپیکر بلوچستان اسمبلی غزالہ گولہ، صوبائی وزیرِ تعلیم راحیلہ حمید خان درانی دے نال پریس کانفرنس کردے ہوئے مشیر وزیراعلیٰ مینا مجید بلوچ نے کہیا کہ بی ایل اے دے دہشت گرداں نے ۵۰ سالہ بی بی حنیفہ تے ۱۷ سالہ دھی نوں گھر وِچ وڑ کے فائرنگ نال قتل کر دتا۔ مشیر مینا مجید نے کہیا کہ فتنۃ ہندوستان دے دہشت گرد عام شہری، سوانیاں تے بالاں نوں نشانہ بنا رہے نے، بلوچستان وِچ ہون والی دہشت گردی دا خاتمہ کراں گے، بلوچستان وِچ امن، ترقی، خوشحالی تے تعلیم نوں فروغ دیاں گے، غیور بلوچاں دا دہشت گرداں نال کوئی تعلق نہیں اے۔
مینا مجید نے کہیا کہ اسما جتک دے والد دے قاتلاں دے خلاف کارروائی جاری اے، بلوچستان وِچ فتنۃ ہندوستان موجود اے، ایہ بات ڈھکی چھپی نہیں، سوانیاں اُتے حملہ کرن والیاں دے خلاف کھڑا ہونا ہوئے گا، دہشت گرد چادر تے چار دیواری دی پامالی کر کے خوف و ہراس پھیلانا چاہندے نے۔
صوبائی وزیرِ تعلیم راحیلہ حمید نے کہیا کہ سوانیاں نوں نشانہ بنا کے دہشت گرد اپنے عزائم وِچ کامیاب نہیں ہو سکدے، بلوچ سوانیاں نوں نشانہ بنانا انتہائی قابلِ مذمت اے، بلوچستان دیاں سوانیاں نوں مارن نال کیہ فائدہ ہو رہیا اے؟
ڈپٹی سپیکر بلوچستان اسمبلی غزالہ گولہ نے کہیا کہ جیہناں دہشت گرداں نے سوانیاں نوں قتل کیتا اوہناں نوں سزا ملے گی، پارلیمنٹیرینز دی ایس نیوز کانفرنس وِچ ایہ موضوع اہم اے جیہڑا زیرِ بحث اے، بلوچ تے پشتون روایتاں وِچ تیویں دی عزت بہت اعلیٰ اے۔
ہادیہ نواز نے کہیا کہ اج گھر وِچ وڑ کے سوانیاں نوں قتل کیتا جاندا اے تے اسیں بھی محفوظ نہیں، ریاست کچھ بھی کر لوے، اوہنوں تنقید دا نشانہ بنایا جاندا اے، ریاست نے سوانیاں نوں روزگار تے بچیاں نوں تعلیم دتی، دہشت گرداں نے اوہناں نال کیہ کیتا؟
