لطیف اکبر، فیصل راٹھور ملاقات، سیاسی صورتحال اتے تبادلہ خیال،
جمہوری روایات دے فروغ، عوامی مسائل دے حل کیتے ممکنہ اقدامات چاوݨ اتے زور، مسئلہ کشمیر اجاگر کرݨ، سیاسی استحکام، ریاستی اداریاں وچ موثر رابطہ کاری اتے اتفاق،
راولپنڈی (نیوز رپورٹر): قائم مقام صدر آزاد جموں و کشمیر چودھری لطیف اکبر اتے وزیراعظم آزاد جموں و کشمیر فیصل ممتاز راٹھور دے وچکار ایوان صدر کشمیر ہاؤس اسلام آباد وچ تفصیلی ملاقات تھئی ہے، ملاقات وچ آزاد جموں و کشمیر دی مجموعی سیاسی صورتحال، باہمی دلچسپی دے امور، مسئلہ کشمیر سمیت اہم معاملیاں اتے تبادلہ خیال کیتا گیا، ملاقات دے دوران آزاد کشمیر وچ حالیہ انتخابات دے بعد پیدا تھیوݨ آلی سیاسی صورتحال اتے آئندہ دے لائحہ عمل اتے وی گفتگو تھئی، ݙوہاں رہنماواں نے ایں امر اتے زور ݙتا جو آزاد جموں و کشمیر وچ سیاسی استحکام، جمہوری روایات دے فروغ اتے عوامی مسائل دے حل کیتے تمام ممکنہ اقدامات چائے ونڄن، قائم مقام صدر اتے وزیراعظم نے مسئلہ کشمیر دے حوالے نال وی تفصیلی تبادلہ خیال کیتا، ایں موقعے تے ایں عزم دا اعادہ کیتا گیا جو حقِ خودارادیت دے حصول تیکر کشمیری عوام دی جدوجہدِ آزادی کوں ملکی اتے بین الاقوامی سطح پر بھرپور انداز وچ اجاگر کیتا ویندا رہسی، ملاقات وچ آزاد کشمیر دی تعمیر و ترقی، عوامی فلاح و بہبود اتے ریاستی اداریاں دے وچکار موثر رابطہ کاری دے حوالے نال وی بات چیت تھئی۔
