عمران خان دے علاج وچ کوتاہی ہوئی تاں ذمہ دار جیل انتظامیہ، عدلیہ ہووے گی: رانا ثناء اللہ

بانی دی صحت رپورٹ تشویشناک، ہسپتال منتقل تے ارکانِ پارلیمنٹ نوں جیل وچ جا کے معائنہ دی اجازت دتی جاوے: راجہ ناصر، سینیٹ وچ عمران خان دی صحت تے بحث، حکومت تے اپوزیشن آمنے سامنے، وفاقی وزرا دی پی ٹی آئی نوں پھر مذاکرات دی دعوت۔

اسلام آباد (وقائع نگار، اے پی پی) سینیٹ وچ بانی پی ٹی آئی عمران خان دی صحت دے معاملے تے پوائنٹ آف آرڈر راہیں بحث دوران حکومت تے اپوزیشن ارکان آمنے سامنے آ گئے۔ قائدِ حزبِ اختلاف سینیٹر علامہ راجہ ناصر عباس نے عمران خان دی صحت متعلق رپورٹ نوں تشویشناک قرار دیندے ہوئے انہاں نوں ہسپتال منتقل کرن تے ارکانِ پارلیمنٹ نوں جیل جا کے انہاں دی صحت دا جائزہ لین دی اجازت دین دا مطالبہ کیتا، جبکہ حکومت نے اپوزیشن دے خدشات مسترد کردے ہوئے کہا کہ سپریم کورٹ وچ جمع کرائی گئی رپورٹ وچ عمران خان نے خود اپنے علاج تے اطمینان دا اظہار کیتا اے۔ حکومت نے پی ٹی آئی نوں پھر مذاکرات دی دعوت وی دتی۔ سینیٹ دا اجلاس چیئرمین سینیٹ سینیٹر سید یوسف رضا گیلانی دی زیرِ صدارت ہویا۔ قائدِ حزبِ اختلاف سینیٹر علامہ راجہ ناصر عباس نے بحث دا آغاز کردے ہوئے کہا کہ عمران خان دی صحت حوالے نال رپورٹ تشویشناک اے تے انہاں نوں ہسپتال منتقل کیتا جانا چاہیدا اے۔ انہاں نے حکومت توں مطالبہ کیتا کہ ارکانِ پارلیمنٹ نوں جیل جا کے عمران خان دی صحت دا جائزہ لین دی اجازت دتی جاوےے۔

وفاقی وزیر برائے سیاسی امور سینیٹر رانا ثناء اللہ نے عمران خان دی صحت تے بحث لئی آمادگی ظاہر کردے ہوئے اپوزیشن دے خدشات مسترد کر دتے۔ انہاں نے کہا کہ سپریم کورٹ وچ جمع کرائی گئی رپورٹ وچ عمران خان نے خود اپنے علاج تے اطمینان دا اظہار کیتا اے۔ عمران خان نال ملاقاتاں دے حوالے نال اپوزیشن نوں وی صورتحال دا علم اے تے ایس معاملے متعلق درخواستاں عدالتاں وچ زیرِ سماعت نے۔ انہاں نے کہا بانی پی ٹی آئی عمران خان دی کسٹڈی جیل انتظامیہ تے عدلیہ کول اے، اگر علاج وچ کسے قسم دی کوتاہی ہوندی اے تاں ایس دے ذمہ دار وی ایہی ادارے ہون گے۔ پی ٹی آئی رہنما سینیٹر اعظم سواتی نے حکومت توں مذاکرات دا بوہا کھولن دا مطالبہ کردے ہوئے کہا کہ عمران خان بات چیت لئی تیار نے۔ انہاں دا کہنا سی کہ عمران خان دے علاج معالجے وچ کسے قسم دی کوتاہی برداشت نہیں کیتی جاوے گی تے قیادت نے مذاکرات لئی آمادگی دا اظہار کیتا اے۔ وفاقی وزیرِ قانون و انصاف سینیٹر اعظم نذیر تارڑ نے کہا کہ عمران خان دے تمام کیسز عدالتاں وچ زیرِ التوا نے جبکہ اپیلاں دی سماعت وچ وی مسائل درپیش نے۔

جیل وچ ملاقات لئی جیل مینوئل موجود اے تے عمران خان دے علاج حوالے نال سپریم کورٹ وی احکامات جاری کر چکی اے۔ انہاں نے اپوزیشن نوں مشورہ دتا کہ سیاسی معاملیاں نال عدالتی پیروی وی تیز کیتی جاوے تے مل بیٹھ کے بات چیت کیتی جاوے۔ وفاقی وزیر برائے پارلیمانی امور ڈاکٹر طارق فضل نے کہا کہ تمام مسائل دا حل یکسوئی تے مذاکرات وچ اے۔ وزیراعظم دی مذاکرات دی دعوت اج وی موجود اے، اپوزیشن وقت تے تھاں دا تعین کرے۔ انہاں نے کہا کہ اک پاسے اپوزیشن مذاکرات نوں سنجیدہ نہیں لیندی تے دوجے پاسے نظام نوں ڈی ریل کرن دی کوشش کیتی جاندی اے۔ وزیرِ مملکت برائے داخلہ سینیٹر طلال چوہدری نے اپوزیشن نوں مذاکرات دی دعوت دیندے ہوئے کہا کہ حکومت دی مذاکراتی کمیٹی ہن وی موجود اے، حکومت کسے سیاسی جماعت دے سیاسی موقف یا احتجاج دے حق توں انکار نہیں کردی تاہم ملاقاتاں جیل مینوئل تے عدالتی احکامات مطابق ای ہون گی۔ عمران خان دی صحت حوالے نال اپوزیشن دے بیانات تے تنقید کردے ہوئے انہاں نے کہا کہ بانی پی ٹی آئی دی جان نوں خطرے متعلق بیانات ماضی وچ وی سامنے آؤندے رہے نے۔ انہاں نے دعویٰ کیتا کہ عمران خان تے بشریٰ بی بی دی 84 ملاقاتاں ہو چکیاں نے۔

سینیٹر ناصر محمود نے کہا کہ پی ٹی آئی جھوٹ بولنا تے دھمکیاں دینا چھڈ دیوے۔ انہاں نے عمران خان دی صحت حوالے نال پی ٹی آئی دے دعویاں نوں غلط قرار دیندے ہوئے کہا کہ عمران خان نوں عدالت نے سزا سنائی اے تے عدالتی فیصلے دا احترام ہونا چاہیدا اے۔ انہاں دے اظہارِ خیال تے پی ٹی آئی ارکان نے احتجاج کیتا تے ایوان وچ ہنگامہ آرائی وی ہوئی۔ بعد وچ سینیٹ وچ کورم دی کمی پاروں اجلاس اج صبح ساڑھے 11 وجے تک ملتوی کر دتا گیا۔