تحقیقاتی کمیشن نے سانحہ بہاولپور نوں سازش قرار دتا سی: اعجاز الحق

پوسٹمارٹم نہ ہون دین، بہاولپور جان تے مجبور کرن والے دا پتہ نہ چل سکیا، جمہوریت دے استحکام لئی بلدیاتی انتخابات منعقد، کرپشن ختم کیتی جاوے: خطاب

راولپنڈی (نیوز رپورٹر) پاکستان مسلم لیگ ضیاء الحق دے سربراہ، رکنِ قومی اسمبلی محمد اعجاز الحق نے کہا اے کہ پاک امریکہ ایئر فورس مشترکہ تحقیقاتی کمیشن نے اپنی رپورٹ وچ سانحہ بہاولپور نوں سازش قرار دتا سی لیکن اج تک ایہہ بات سامنے نہیں آ سکی کہ کس نے جنرل ضیاء الحق تے اوہناں دے رفقا نوں بہاولپور جان لئی چار بار کالاں کر کے مجبور کیتا، کس نے پوسٹمارٹم نہیں ہون دتا۔ ملک وچ اگر جمہوریت نوں مستحکم کرنا اے تے بلدیاتی انتخابات کرائے جاون تے کرپشن دا خاتمہ کیتا جاوے۔ ایہناں خیالات دا اظہار اوہناں نے پیر نوں راولپنڈی دے مقامی ہوٹل وچ سانحہ بہاولپور دے شہدا دی 38ویں برسی تے منعقدہ سیمینار نال خطاب کردے ہوئے کیتا۔

اعجاز الحق نے کہا رپورٹ وچ ایہہ وی کہا گیا کہ جہاز دے اندر کوئی تکنیکی خرابی نہیں سی، سانوں دسیا جاوے کہ کس نے جنرل ضیاء الحق تے رفقا نوں بہاولپور بھجوایا، سانحہ بہاولپور دی تحقیقات لئی بندیال، شجاعت، شفیع کمیشن بنے لیکن کسے دی فائنڈنگ سامنے نہیں آ سکی۔ اختیارات عوام تک پہنچان لئی بلدیاتی اداریاں نوں مضبوط تے کرپشن نوں ختم کیتا جاوے نہیں تے ایس دے ایہوجہے نتائج مرتب ہون گے جو سبھ کچھ لپیٹ لین گے۔ سیمینار نال مسلم لیگ ن دے ایم این اے شاکر بشیر اعوان، سابق صوبائی وزیر ڈاکٹر انوار الحق، چورا شریف دے سجادہ نشین پیر صاحبزادہ حسنین، ایم پی اے چودھری غلام مرتضیٰ، مسلم لیگ ن دے رہنما سجاد خان تے دوجیاں نے وی خطاب کیتا