فائلنگ، کٹوتی توں حاصل ٹیکس کریڈٹ سپر ٹیکس خلاف ایڈجسٹ کیتا جا سکدا اے: وفاقی آئینی عدالت

ٹیکس دہندگان نوں ایڈجسٹمنٹ توں روک کے ریفنڈ ول دھکیلنا قانون دی منشا خلاف: عدالت، ہائیکورٹ دا فیصلہ کالعدم، مالیاتی قوانین دی تعبیر ٹیکس دہندہ دے فائدے نوں مدِ نظر رکھ کے کیتی جانی چاہیدی اے، اپیل منظور، دعوے تے قانون دے مطابق فیصلے دا حکم

اسلام آباد (کورٹ رپورٹر) وفاقی آئینی عدالت نے کارپوریٹ ٹیکس دہندگان دے حق وچ اہم فیصلہ دیندے ہوئے سپر ٹیکس دے خلاف ٹیکس کریڈٹ دی ایڈجسٹمنٹ قانون دے مطابق جائز قرار دتی تے اسلام آباد ہائیکورٹ دا فیصلہ کالعدم قرار دے دتا۔ جسٹس عامر فاروق نے 6 صفحیاں تے مشتمل تفصیلی فیصلہ تحریر کیتا۔ عدالت نے نجی موبائل کمپنی دی دائر اپیلاں منظور کر لئیاں تے فیصلے وچ قرار دتا کہ فائلنگ تے کٹوتی دے نتیجے وچ حاصل ٹیکس کریڈٹ سپر ٹیکس دے خلاف ایڈجسٹ کیتا جا سکدا اے۔ انکم ٹیکس آرڈیننس دی دفعہ 168 دے تحت حاصل شدہ ٹیکس کریڈٹ ایک الگ تے مسلمہ قانونی حق اے۔ ٹیکس دہندہ نوں ایڈجسٹمنٹ توں روک کے صرف ریفنڈ دے حصول ول دھکیلنا قانون دی منشا دے خلاف اے تے مالیاتی قوانین دی تعبیر ہمیشہ ٹیکس دہندہ دے فائدے تے سہولت نوں مدِ نظر رکھدے ہوئے کیتی جانی چاہیدی اے۔ فیصلے وچ ایف بی آر نوں ہدایت کیتی گئی اے کہ عدالت دے نوٹس دے جواب وچ ٹیکس دہندہ دی جانب توں دائر ایڈجسٹمنٹ دے دعوے دا قانون دے مطابق جائزہ لے کے فیصلہ کیتا جاوے۔ کیس دے مطابق ایف بی آر نے نجی موبائل کمپنی نوں سپر ٹیکس ادائیگی لئی نوٹس جاری کیتا سی۔ کمپنی نے سپر ٹیکس دے خلاف اپنے دستیاب ٹیکس کریڈٹ دی ایڈجسٹمنٹ لئی اسلام آباد ہائیکورٹ توں رجوع کیتا جس نے درخواست خارج کر دتی سی۔ وفاقی آئینی عدالت نے ہائیکورٹ دا فیصلہ کالعدم قرار دیندے ہوئے کمپنی دی اپیلاں منظور کر لئیاں۔