بلوچستان دے وکھ وکھ علاقیاں وچ فورسز دیاں کارروائیاں، 9 دہشت گرد ہلاک

راولپنڈی bn آپریشن ردالفتنہ 3 دے تحت بلوچستان دے وکھ وکھ علاقیاں وچ سکیورٹی فورسز دیاں دہشت گرداں دے خلاف کامیاب کارروائیاں جاری نیں۔
سکیورٹی ذرائع دے مطابق سکیورٹی فورسز نے زیارت، ہرنائی تے سوراب وچ دہشت گرداں دے خلاف انٹیلی جنس بیسڈ آپریشن دے دوران 9 دہشت گرد جہنم واصل کر دتے۔
سکیورٹی فورسز نے خفیہ اطلاع اتے زیارت تے ہرنائی دے وچکار پہاڑی سلسلے وچ وڈا انٹیلی جنس بیسڈ آپریشن کیتا، جتھے دہشت گرداں دے ٹھکانے نوں گھیرے وچ لے کے موثر انداز وچ نشانہ بنایا جیدے وچ 8 دہشت گرد ہلاک ہوئے۔
ذرائع نے دسویا کہ انٹیلی جنس بیسڈ آپریشن دے دوران سکیورٹی فورسز نے دہشت گرداں دے ٹھکانے نوں وی تباہ کر دتا۔
سکیورٹی ذرائع دے مطابق ضلع سوراب دے علاقے حاجیکہ پنڈ وچ کامیاب آپریشن دے دوران اک دہشت گرد جہنم واصل ہویا، سکیورٹی فورسز نے دشت کٹائی تے حاجیکہ دے وچکار موثر ناکہ بندی قائم کیتی تے دہشت گرداں دی نقل و حرکت دا سراغ لایا۔
سکیورٹی ذرائع نے دسویا کہ ہلاک دہشت گرداں دے قبضے توں ایمونیشن، میگزین، دستی بم، واکی ٹاکی، موٹر سائیکل تے دوجا سامان برآمد کر لیا گیا اے۔
سکیورٹی فورسز بلوچستان وچ دہشت گردی دے مکمل خاتمے تے دیرپا امن دے قیام تک بلا تعطل اپنی کارروائیاں جاری رکھن دے عزم اتے قائم نیں۔