اسحاق ڈار نال روسی تے فرانسیسی سفیراں دی ملاقات
البرٹ خوریف نال ملاقات وچ امن و استحکام لئی گل بات دے تسلسل تے زور، نکولس گیلے نوں سفارتی ذمہ داریاں مکمل کرن تے مبارکباد، تعاون ودھان دا عزم
اسلام آباد نائب وزیراعظم اسحاق ڈار نال روسی تے فرانسیسی سفیراں نے ملاقاتاں کیتیاں۔ روس دے سفیر البرٹ خوریف نال ملاقات وچ پاک روس دوطرفہ تعلقات وچ پیش رفت دا جائزہ لیا گیا تے علاقائی امن و استحکام لئی سفارتی حل تے گل بات دے تسلسل تے زور دتا گیا۔ ملاقات دوران نائب وزیراعظم نے پاک روس دوطرفہ تعلقات وچ آؤن والے مثبت موڑ تے ودھدی پیش رفت نوں سراہیا۔ انہاں نے دوہاں ملکاں وچکار تعلقات نوں مزید مضبوط کرن لئی اہم تے کلیدی شعبیاں وچ تعاون دے ودھاء نال نال اعلیٰ سطح دے رابطیاں تے ملاقاتاں دے تسلسل دی اہمیت تے خاص زور دتا۔
ایس موقعے تے نائب وزیراعظم نے پاکستان دے ایس دیرینہ تے اصولی موقف نوں دہرایا کہ رولیاں (تنازعات) دے حل، اختلافاں نوں دور کرن تے خطے وچ پائیدار امن و استحکام دے ودھاء لئی صرف گل بات تے سفارت کاری ای واحد حل نیں۔
ایس دوران اسحاق ڈار نال فرانسیسی سفیر نکولس گیلے نے الوداعی ملاقات کیتی۔ دفتر خارجہ دے مطابق نائب وزیراعظم نے سفیر نکولس گیلے نوں اپنی سفارتی ذمہ داریاں مکمل کرن تے مبارکباد دتی تے پاکستان تے فرانس دے تعلقات نوں مزید مضبوط بنان لئی انہاں دیاں خدمات نوں سراہیا۔ نائب وزیراعظم نے دوہاں ملکاں وچکار دوطرفہ تعاون نوں مزید وسعت دین دی لوڑ تے زور دیندیاں باہمی دلچسپی دے دوطرفہ تے علاقائی معاملیاں تے اعلیٰ سطح دے رابطیاں، گل بات تے مشاورت دے تسلسل دی اہمیت تے وی زور دتا۔
