ملک وچ لنگڑا نظام، بہاولپور تے ہزارہ فوری طور تے صوبے بنائے جان: محمد علی درانی
محسن نقوی، میاں عامر محمود فارمولے دے مطابق وی دوویں صوبے بناؤن دی آئینی لوڑ پہلاں ہی پوری ہو چکی؛ عوام حکمراناں توں تنگ آ چکے نیں، پہلاں ہی آکھیا سی عمران ڈیل نہیں ڈائیلاگ کرے گا: سابق وفاقی وزیر، پریس کانفرنس
لاہور (کامرس رپورٹر توں): سابق وفاقی وزیرِ اطلاعات محمد علی درانی نے آکھیا اے کہ ملک دا موجودہ نظام لنگڑا اے، اک لت (ٹانگ) تے زیادہ نہیں چل سکدا، عوام نوں شامل کیتے بغیر ملک اگانہہ نہیں ودھے گا، بہاولپور تے ہزارہ دے دو ماڈل صوبے فوری بنائے جان، جیویں جیویں اتفاقِ رائے ہوندا جاوے مزید صوبے بناندے جاؤ۔ محسن نقوی تے میاں عامر محمود فارمولے دے مطابق وی دوویں صوبے بناؤن دی آئینی لوڑ پہلاں ہی پوری ہو چکی اے۔ اوہناں ایہناں خیلاں دا اظہار لاہور پریس کلب وچ پریس کانفرنس نال خطاب کردیاں کیتا۔
محمد علی درانی نے مزید آکھیا کہ بہاولپور تے ہزارہ صوبے دیاں قرار داداں صوبائی اسمبلیاں توں منظور ہویاں پئیاں نیں، اگلے مہینے سینیٹ تے قومی اسمبلی وچ ایہ معاملہ چکاں گے (اٹھاواں گے)، بہاولپور صوبہ پورے ملک دی فوڈ باسکٹ بنے گا۔ چولستان دا 64 لکھ ایکڑ رقبہ واہیا (زیرِ کاشت) ہی نہیں، ہزارہ صوبہ سیاحت تے معدنیات نال مالا مال اے۔ صوبے بنن نال انتظامی خرچہ نہیں ودھے گا سگوں عوام تے خرچہ ودھے گا، پہلاں دو ماڈل صوبے بنا دیو، جدوں نویں صوبے بنن گے تاں اوہناں دی افادیت دا پتہ چلے گا، پھر اتفاقِ رائے نال مزید صوبے بناندے جاؤ۔ حکومتی انتظام بہتر کرن لئی نویں صوبے بناؤنے پین گے۔
سابق وفاقی وزیر نے مزید آکھیا کہ ایہ حکومتاں بلدیاتی ادارے کیوں نہیں چلاؤندیاں، عوام دی شرکت توں بغیر ایہ نظام نہیں چلے گا، عوام ایہناں حکمراناں توں تنگ آ چکے نیں، ہݨ پیسے صوبے دی عوام نوں نہیں سگوں وزیراعلیٰ نوں ملدے نیں، کھرباں روپے صرف 4 بندیاں دی صوابدید تے ہوندے نیں، سیاست کرنی اے تاں عوامی مفاد نوں ترجیح دیو۔
محمد علی درانی نے آکھیا کہ میں پہلاں ہی آکھیا سی بانی تحریکِ انصاف ڈیل نہیں ڈائیلاگ کرے گا تے ہݨ معاملے ایسے پاسے جا رہے نیں، زرداری صاحب توں گلا اے کہ اوہ عوامی مفاد وچ بنن والیاں نہراں تے کالا باغ ڈیم دی مخالفت کردے نیں۔
