جنوبی پنجاب دیاں محرومیاں دور کرنا پہلی ترجیح: مریم نواز: مظفر گڑھ دے اراکینِ اسمبلی دی ملاقات
تیز ترین پانی دے نکاس دا حکم، نالہ لئی لئی بچاء والے قدماں دی ہدایت، راولپنڈی، اٹک، گجرات دے ڈی سیز نال رابطہ۔ انسانیت دی خدمت دا جذبہ تعصباں توں اُتے، دوجیاں لئی سکھ پیدا کرنا عبادت: انسانی ہمدردی دے دہاڑے تے سنیہا۔
لاہور (نیوز ایجنسیاں): وزیراعلیٰ پنجاب مریم نواز شریف تے مسلم لیگ (ن) دے صدر محمد نواز شریف نال سعودی عرب دے سفیر نواف بن سعید المالکی نے وزیراعلیٰ آفس وچ الوداعی ملاقات کیتی اے۔ ملاقات دے دوران سعودی سفیر دا نِگھا آدر کیتا گیا تے دوہاں آگوآں نے پاک سعودی تعلقات وچ اوہناں دیاں سفارتی خدمات نوں سراہیا۔ ملاقات دے دوران نواز شریف تے وزیراعلیٰ مریم نواز نے نواف بن سعید المالکی دی پاکستان تے سعودی عرب دے آپسی تعلقات نوں ودھاون لئی کیتیاں گئیاں کوشلاں نوں بہت قدر دی نگاہ نال دیکھیا۔ ایس موقعے تے سعودی عرب دے سفیر نواف بن سعید المالکی نے آکھیا کہ اوہناں دا پاکستان وچ رہنا بہت یادگار رہیا تے اوہ پاکستانی لوکاں تے قیادت ولوں ملن والی سچی پروہن چاری تے دلوں شکر گزار نے۔
ایس توں علاوہ نواز شریف تے وزیراعلیٰ مریم نواز نال ضلع مظفرگڑھ دے اراکینِ صوبائی اسمبلی نے ملاقات کیتی تے دیس دی سیاسی صورتحال تے جنوبی پنجاب وچ چل رہے ترقیاٹی منصوبیاں تے تفصیلی گل بات کیتی۔ اراکینِ اسمبلی نے مظفرگڑھ وچ الیکٹرک بس سروس، صاف پانی دے منصوبے تے چیف منسٹر لوکل روڈ پروگرام دے تحت رابطہ سڑکاں دی بݨائی تے مرمت تے وزیراعلیٰ نوں خراجِ تحسین پیش کیتا۔ ایس موقعے تے وزیراعلیٰ مریم نواز نے آکھیا کہ مسلم لیگ (ن) تھوتھے نعریاں دی بجائی عملی ترقی تے یقین رکھدی اے تے جنوبی پنجاب دیاں محرومیاں نوں مکاؤنا حکومت دی پہلی ترجیح اے۔
ایس توں وکھ وزیراعلیٰ نے بارشاں دے دوران پورے صوبے وچ تیز ترین پانی دے نکاس دا حکم دیندیاں ہوئیاں راولپنڈی، اٹک تے گجرات دے ڈپٹی کمشنراں نال دِھپاں دِھپ رابطہ کیتا تے بہت سارے علاقیاں وچ کجھ ہی گھنٹیاں وچ پانی دے نکاس تے انتظامیہ نوں شاباش دتی اے۔ وزیراعلیٰ نے بارش توں بعد پیدا ہون والی صورتحال تے پانی دے نکاس دے عمل تے تفصیلی رپورٹ منگ لئی۔
اوہناں نے لوکاں دی سہولت لئی سارے لبھدے وسیلے ورتوں وچ لے کے آؤن دی ہدایت کردیاں ہوئیاں خاص طور تے راولپنڈی دے نالہ لئی وچ برسات دے ہڑ نوں وہندیاں ہوئیاں بہترین تے ویلے سر بچاء والے قدماں دی سخت ہدایت جاری کیتی اے۔ دوجے پاسے وزیراعلیٰ مریم نواز شریف نے انسانی ہمدردی دے عالمی دہاڑے دے موقعے تے جنگاں تے قدرتی آفتاں وچ دکھی لوکاں دی مدد کرن والے امدادی کامیاں، رضاکاراں، ڈاکٹران، نرسان تے ریسکیو اہلکاراں نوں خراجِ تحسین پیش کیتا تے دنیا بھر وچ لوڑوند لوکاں تیکر امداد دی موثر پہنچ دی اپیل کردیاں ہوئیاں اپنے خاص سنیہے وچ آکھیا کہ انسانیت دی خدمت دا جذبہ رنگ، نسل، مذہب تے ہر ونڈ دے تعصباں توں اُتے اے، دوجیاں لئی سکھ تے آسانی پیدا کرنا اصل وچ خدمتِ خلق تے عبادت اے۔ امدادی کامے نہ صرف خوراک تے طبی سہولتاں دیندے نے سگوں خطرناک علاقیاں وچ اپنی جند جوکھم وچ پا کے آس دی کرن بنھدے نے۔ پاکستان ولوں دہائیاں تیکر لکھاں افغان مہاجراں دی پروہن چاری کرنا جذبہِ انسانیت تے آپسی تعاون دی وڈی مثال اے، تے پنجاب حکومت ہر اوکھے ویلے وچ ماڑے طبقات دے بچاء لئی موڈھے نال موڈھا جوڑ کے کھلوتی روے گی۔
