صدر نوں فوسپاہ، ٹیکس محتسب، ایف پی ایس سی دیاں سالانہ رپورٹاں پیش کیتیاں گئیاں۔

شکایتاں دا فوری حل یقینی بناؤن لئی جدید ٹیکنالوجی توں فائدے اٹھائے جان، سرکاری نوکریاں وچ شفافیت تے پیشہ ورانہ معیار یقینی بنایا جاوے: صدر زرداری

اسلام آباد (سٹاف رپورٹر): صدر مملکت نال فوسپاہ دی محتسب فوزیہ وقار، وفاقی ٹیکس محتسب ظفر الحق حجازی تے چیئرمین وفاقی پبلک سروس کمیشن لیفٹیننٹ جنرل ریٹائرڈ اختر نواز ستی نے وکھ وکھ ملاقاتاں کیتیاں تے اپنے اداریاں دیاں سالانہ رپورٹاں پیش کیتیاں۔

صدر آصف علی زرداری نے کہیا کہ کم والی تھاں تے ہراسانی دیاں شکایتاں دے فوری تے موثر حل نوں یقینی بناؤن لئی اندرونی طریقہ کار تے نگرانی دے نظام نوں ہور مضبوط بنایا جاوے۔ صدر مملکت نے ایہناں خیالات دا اظہار فوسپاہ دی محتسب فوزیہ وقار نال ایوانِ صدر وچ ملاقات دوران کیتا، جنہاں نے اوہناں نوں ادارے دی سالانہ رپورٹ 2025 پیش کیتی۔

ایس توں علاوہ، صدر نال وفاقی ٹیکس محتسب ظفر الحق حجازی نے ملاقات کیتی تے سالانہ رپورٹ 2025ء پیش کیتی۔ صدر نے وفاقی ٹیکس محتسب دے فیصلےآں تے سفارشاں تے عمل درآمد دی نگرانی لئی موثر طریقہ کار نوں ہور مضبوط بناؤن تے زور دتا تے کہیا کہ شکایتاں دے فوری حل نوں یقینی بناؤن لئی جدید ٹیکنالوجی توں فائدے اٹھائے جان۔

ایہدے نال ہی، صدر زرداری نال چیئرمین وفاقی پبلک سروس کمیشن لیفٹیننٹ جنرل ریٹائرڈ اختر نواز ستی نے ملاقات کیتی تے اوہناں نوں ایف پی ایس سی دی سالانہ رپورٹ 2024 پیش کیتی۔ صدر نے سرکاری نوکریاں وچ بھرتیاں دے عمل وچ میرٹ، شفافیت تے پیشہ ورانہ معیار یقینی بناؤن تے زور دتا۔