عمران خان دی ہسپتال منتقلی خلاف حکومتی درخواست تے اعتراض۔
دوبارہ دائر کر دتی، درخواست توں بہت سارے معاملے صاف ہو جان گے: رانا ثنا اللہ۔
اسلام آباد سپریم کورٹ نے عمران خان نوں ہسپتال منتقل کرن دے فیصلے خلاف حکومتی درخواست تے اعتراض لا کے موڑ دتی۔ ذرائع مطابق سپریم کورٹ دے رجسٹرار آفس ولوں عمران خان دی ہسپتال منتقلی دے فیصلے خلاف حکومتی نظرثانی درخواست تے گزری دہاڑے اعتراض لاؤندا گیا۔ ذرائع دا کہنا اے کہ نظرثانی درخواست نال پیپر بُکس مکمل نہ ہون دا اعتراض لایا گیا سی۔ چیتے رہے کہ سپریم کورٹ نے 2 دہاڑے پہلاں عمران خان نوں شفا ہسپتال منتقل کرن دا حکم دتا سی۔ بعد وچ چیف کمشنر اسلام آباد نے ایڈووکیٹ جنرل اسلام آباد راہیں عمران خان دی ہسپتال منتقلی دے فیصلے تے نظرثانی دی درخواست دائر کیتی سی۔ دوجے پاسے وزیراعظم دے مشیر برائے سیاسی امور رانا ثناء اللہ خان نے پارلیمنٹ ہاؤس وچ میڈیا نال گل بات کردیاں کہیا کہ حکومت آئین تے قانون دی پابند اے، حکومت نے اعتراض دور کر کے نظرثانی اپیل مڑ دائر کر دتی اے، اپیل دا فیصلہ آؤن دیو، فیصلے نال معاملے صاف ہو جان گے، امید اے درخواست تے فیصلہ اج یا کل تک آ جاوے گا۔
اوہناں کہیا بانی پی ٹی آئی نوں ہسپتال منتقل کرن دی کوئی ڈیڈ لائن نہیں۔ حکومت ایس گل تے صاف اے کہ سپریم کورٹ دے فیصلے نال کرمنل جسٹس سسٹم متاثر ہووے گا، سوال ایہ اے کہ سپریم کورٹ دا فیصلہ ماتحت عدالتاں تے بائنڈنگ ہوندا اے، کیہ ایس فیصلے توں بعد ہر قیدی نوں پرائیویٹ ہسپتال منتقل کیتا جاوے گا؟ ایس طرحاں تاں ماتحت عدالتاں کول کوئی عذر نہیں رہے گا۔ رانا ثناء نے مزید کہیا کہ نواز شریف جیل توں سرکاری سروسز ہسپتال گئے سن جِتھے ڈاکٹراں دے میڈیکل بورڈ نے تجویز کیتا سی کہ نواز شریف دا علاج باہرلے ملک ہونا چاہی دا اے، میڈیکل بورڈ دی تجویز تے نواز شریف دا علاج باہرلے ملک ہویا تے حکومت نے اجازت دتی۔ حکومت دی نظرثانی درخواست وچ وی مؤقف لیا گیا اے کہ جیل توں کسی قیدی نوں باہر ہسپتال منتقل کرن لئی قانونی طریقہ موجود اے تے متعلقہ حکام دے اختیاراں نوں پاسے کر کے عبوری حکم جاری کیتا گیا۔ درخواست وچ پاکستان پریزن رولز 1978 دے رول 197 دا حوالہ دتا گیا اے۔
