خیبرپختونخوا، نادرا ای سہولت راہیں فرد جاری کرن دی منظوری۔
وزیراعلیٰ سہیل آفریدی نے منظوری دتی، افتتاح آؤندے ہفتے یقینی بناوݨ دی ہدایت۔
پشاور (آن لائن) وزیراعلیٰ خیبرپختونخوا محمد سہیل آفریدی نے شہریاں دی سوکھ لئی نادرا ای سہولت مراکز راہیں وی زمین دا فرد جاری کرن دی سہولت دی اصولی منظوری دندیاں متعلقہ حکام نوں ہدایت کیتی کہ ایس نویں سہولت دا افتتاح آؤندے ہفتے یقینی بنایا جاوے تاکہ شہری بنا کسی تاخیر ایس توں فائدہ چک سکن۔ محکمہ مال وچ اصلاحات حوالے نال اک اہم اجلاس دی صدارت کردیاں وزیراعلیٰ نے کہیا کہ صوبائی حکومت عوام نوں اوہناں دی بوہے تے سہولتاں دین لئی عملی قدم چُک رہی اے۔ زمیناں دیاں فردایں ہن نادرا ای سہولت مراکز توں وی جاری کیتیاں جان گیاں، جِس نال شہریاں دے قیمتی ویلے تے وسلیاں دی بچت ہووے گی تے اوہناں نوں سرکاری دفتراں دے فالتو چکراں توں وی آزادی ملے۔
سہیل آفریدی نے کہیا کہ اسیں عوام دوست طرزِ حکمرانی تے یقین رکھدے آں تے شہریاں نوں اوہناں دی بوہے تے سہولتاں دی فراہمی ساڈی ترجیح اے۔ اوہناں مزید کہیا کہ زمین دے فرد دے اجرا دا نواں نظام شہریاں لئی سوکھ، شفافیت تے سہولت دا ضامن ہووے گا۔ ایس موقعے تے بریفنگ دندیاں دَسیا گیا کہ زمین دے فرد دی سرکاری فیس تے ہور سروس چارجز دی ادائیگی مکمل طور تے کیش لیس طریقے نال کیتی جاوے گی۔ اجلاس نوں لینڈ ایکوزیشن بل 2026 دے مسودے تے وی تفصیلی بریفنگ دتی گئی۔ وزیراعلیٰ نے ہدایت کیتی کہ لینڈ ایکوزیشن دے کم وچ فالتو تاخیر روکن لئی نویں بل وچ خاص شقاں شامل کیتیاں جان تے بل نوں جلد حتمی شکل دے کے منظوری لئی متعلقہ فورمز تے پیش کیتا جاوے۔ وزیراعلیٰ نے لینڈ ایکوزیشن بل 2026 دے مسودے نوں سراہندیاں کہیا کہ ایہ بل قائد عمران خان دے وژن دے عین مطابق اے تے ایس وچ عوامی مفاد نوں سبھ توں اگے رکھیا گیا اے۔
