بقایا جات دی ناں ادائیگی، سندھ وچ ڈاک ونڈ دا پربندھ ڈک گیا

پارسلز، سرکاری تے کاروباری چٹھیاں، رجسٹرڈ خطاں دی ونڈ دا پربندھ بحران دا شکار

اسلام آباد (نیوزرپورٹر) سندھ وچ پاکستان پوسٹ دا ڈاک ونڈ پربندھ ٹرانسپورٹ دے بقایا جات دی ناں ادائیگی پاروں ڈک گیا اے، صوبے وچ پارسلز، سرکاری تے کاروباری چٹھیاں تے رجسٹرڈ خطاں دی ترسیل دا پربندھ بحران دا شکار ہو گیا اے۔ آل پاکستان پوسٹل ڈی ایم اوز ایمپلائز یونین (سی بی اے) نے سیکرٹری مواصلات تے ڈائریکٹر جنرل پاکستان پوسٹ نوں چٹھی لکھی اے جیہدی وچ کیہا گیا اے کہ ناردرن سرکل حیدرآباد دے سارے میل موٹر ٹھیکیداراں (کنٹریکٹرز) نے لمیوے ویلے توں بقایا جات ادا نہ کیتے جان تے آپریشن مکمل طور تے بند کر دتا اے۔ ٹھیکیداراں دے اس قدم نال پوسٹ آفسز، ڈسٹرکٹ میل آفسز (DMOs) تے ڈلیوری سنٹراں وچ ہزاراں دی گنتی وچ ڈاک دے ڈھیر لگ گئے نے جیہدے نال نہ صرف عام شہری سگوں کاروباری تے سرکاری ادارے وی ڈاڈھی اؤکڑ دا ساہمنا کر رہے نے، میل موٹر کنٹریکٹرز دے بقایا جات دی ترت ادائیگی کر کے ترسیل دا پربندھ بحال کیتا جاوے