انسانی سمگلنگ: ایف آئی اے دیاں کارروائیاں، 16 بندے پھڑے گئے

گوجرانوالہ، گجرات تے سیالکوٹ توں پھڑے گئے ملزماں نے کروڑاں روپے بٹورے۔ ملزم طالب نے 36 ہزار ریال، 3 ہزار امریکی ڈالر، 3 ہزار 600 یورو ہتھیا لیے۔

گوجرانوالہ، سیالکوٹ (نیوزرپورٹر، نمائندہ دنیا) ایف آئی اے گوجرانوالہ زون نے انسانی سمگلنگ، غیر قانونی طور تے باہرلے ملک بھیجن تے ٹھگی (دھوکہ دہی) وچ ملوث بندیاں خلاف گوجرانوالہ، گجرات تے سیالکوٹ سرکلز وچ کارروائیاں کر کے 16 ملزماں سمیت کاپی رائٹ دی خلاف ورزی دے مقدمے دے اک ملزم نوں پھڑ لیا۔ گوجرانوالہ سرکل توں 9، گجرات سرکل توں 5 تے سیالکوٹ سرکل توں 3 ملزم پھڑے گئے۔ پھڑے گئے انسانی سمگلراں تے ایجنٹاں وچ رئیسات، شفقت، حیدر، صابر سلیم، فرخ شہزاد، اظہر شاہد، طالب سیٹھی، یاسر عرفت، احمد بلال، آزاد محمود، بابر شریف، ساجد، رانا نعمان، آصف، جمشید مسیح تے فرحت فیاض شامل نے۔

کاپی رائٹ دی خلاف ورزی تے ملزم شہرام نوں پھڑیا گیا۔ ترجمان ایف آئی اے مطابق پھڑے گئے ملزم شہریاں نوں اٹلی، سپین، کینیڈا، یونان، سعودی عرب، عراق، کرغزستان، دبئی تے بیلاروس بھیجن تے اتھے نوکری ویزے دا جھانسا دے کے رقم ہتھیا لیندے سن۔ ملزماں نے شہریاں توں 2 کروڑ 9 لکھ 8 ہزار روپے وصول کیتے جد کہ اک مقدمے دے ملزم طالب سیٹھی نے متاثرہ بندے توں 36 ہزار سعودی ریال، 3 ہزار امریکی ڈالر تے 3 ہزار 600 یورو بٹورے۔ ملزماں خلاف پرچے درج کر کے تفتیش شروع کر دتی گئی اے۔