سپرنٹنڈنٹ سینٹرل جیل گوجرانوالہ مبینہ بدعنوانی (کرپشن) تے پھڑیا گیا

گوجرانوالہ (سٹاف رپورٹر، این این آئی) گوجرانوالہ دی سینٹرل جیل دے سپرنٹنڈنٹ اظہر جاوید چیمہ نوں مبینہ بدعنوانی (کرپشن) تے پھڑ لیا گیا۔ اینٹی کرپشن حکام مطابق سپرنٹنڈنٹ تے کرپشن دے الزام نے۔

جوڈیشل مجسٹریٹ نے سپرنٹنڈنٹ سنٹرل جیل دا ساڑھے چار کروڑ رشوت لین دے مقدمے وچ 5 دناں دا جسمانی ریمانڈ دے دتا۔ اظہر جاوید چیمہ خلاف حساس ادارے دے افسر دا ناں تے اپنی اتھارٹی دا غلط ورتوں کر کے رشوت لین دا الزام اے۔ اینٹی کرپشن گوجرانوالہ دے سرکل آفیسر تے دوجے اہلکاراں نے اظہر جاوید چیمہ نوں ڈیوٹی جوڈیشل مجسٹریٹ شہزاد مشتاق دی عدالت وچ پیش کیتا، پیشی تے میڈیا دے کیمریاں توں بچن لئی سپرنٹنڈنٹ جیل نے منہ تے ماسک چڑھا رکھیا سی۔ اینٹی کرپشن حکام نے ڈیوٹی مجسٹریٹ توں تفتیش تے ساڑھے چار کروڑ روپے رشوت دی برآمدگی لئی 12 دناں دے جسمانی ریمانڈ دی درخواست کیتی۔

مجسٹریٹ دے پُچھن تے اینٹی کرپشن حکام نے دَسّیا ملزم خلاف تلونڈی موسیٰ دے رہائشی افضل چودھری دی درخواست تے 19 اگست نوں پرچہ درج کیتا گیا تے گرفتاری لنگھے دہاڑے جمعرات نوں کیتی گئی۔ ڈیوٹی مجسٹریٹ نے سماعت بعد ملزم دا جسمانی ریمانڈ دین بارے فیصلہ محفوظ رکھ لیا پر کجھ ویلے بعد ملزم نوں 5 دناں دے جسمانی ریمانڈ تے اینٹی کرپشن حکام دے حوالے کر دتا۔ ذرائع مطابق سپرنٹنڈنٹ خلاف حساس ادارے دے افسر دے ناں تے تے دوجے معاملیاں بارے رشوت لین دی انکوائری چل رہی سی۔ عدالت توں باہر اینٹی کرپشن حکام دا کہنا سی کہ تفتیش دوران ملزم توں رشوت وراں لی گئی رقم برآمد کیتی جاوے گی تے ملزم نوں اگلی تریخ تے مڑ عدالت پیش کیتا جاوے گا۔