وزرا غیر حاضر، طارق فضل دی وزیراعظم نوں کارروائی دی سفارش
قفہ سوالات دوران آر ایل این جی دے گھریلو کنکشناں اُتے کارروائی روکݨ دا انکشاف
اسلام آباد (نامہ نگار) قومی اسمبلی وچ وقفۂ سوالات دے آغاز اُتے متعلقہ وزارت دے حکام، وزیر تے پارلیمانی سیکرٹری دی عدم موجودگی اُتے سپیکر نے سخت برہمی دا اظہار کیتا۔ قومی اسمبلی دا اجلاس سپیکر ایاز صادق دی زیرِ صدارت شروع ہویا۔
وقفۂ سوالات دے آغاز اُتے وزارتِ سائنس و ٹیکنالوجی دے وزیر، پارلیمانی سیکرٹری تے وزیرِ پارلیمانی امور موجود نہیں سن۔ سپیکر نے پچھیا کہ وزارت ولوں کون آیا اے۔ وزارت دے جوائنٹ سیکرٹری دی موجودگی اُتے سپیکر نے انہاں نوں ہدایت کیتی کہ وفاقی سیکرٹری نوں بلا کے لے کے آؤ۔
ایس دوران وزیرِ پارلیمانی امور ڈاکٹر طارق فضل ایوان وچ آ گئے۔ سپیکر نے آکھیا کہ گزشتہ روز وی وزیر موجود نہیں سن تے اج وی نہیں نیں۔
ڈاکٹر طارق فضل نے آکھیا کہ کجھ وزیراں دا غیر ذمہ دارانہ رویہ اے، اس بارے وزیراعظم نال گل کر کے انہاں خلاف کارروائی دی سفارش کران گے۔
وزارتِ پٹرولیم نے تحریری طور اُتے دَسیا کہ موجودہ حکومت نے ستمبر 2025 وچ آر ایل این جی اُتے نویں گھریلو کنکشناں دی فراہمی اُتے عائد پابندی وچ نرمی دی منظوری دِتی سی، تاہم سپلائر ولوں آر ایل این جی دی عدم فراہمی دے باعث نویں گھریلو کنکشناں اُتے کارروائی عارضی طور اُتے روک دِتی گئی اے۔
