پاکستان نے عالمی سرمایہ کاری لئی پہلا ڈی پی آر پروگرام متعارف کرا دِتا

اسلام آباد (خصوصی نیوز رپورٹر) پاکستان نے عالمی سرمایہ کاری حاصل کرن تے مالیاتی ذرائع وِچ تنوع لے آؤن لئی اپنا پہلا ڈائیورسفائیڈ پیمنٹ رائٹس (ڈی پی آر) پروگرام متعارف کرا دِتا اے، جیہنوں جدید مالیاتی نظام ولّ اک وڈا قدم قرار دِتا جا رہیا اے۔
مشیر وزیر خزانہ خرم شہزاد دے مطابق ڈی پی آر پروگرام عالمی سرمایہ کاراں توں غیر ملکی کرنسی وِچ لمے چِر لئی فنانسنگ حاصل کرن دا نواں ذریعہ اے، جیہدے نال پاکستان نوں عالمی سرمایہ مارکیٹاں تیکر پہنچ ودھاؤن وِچ مدد ملے گی۔ ایس سلسلے وِچ انٹرنیشنل فنانس کارپوریشن (آئی ایف سی) تے بینک الفلاح دے وچکار پروجیکٹ معاہدہ طے پا گیا اے۔ پروگرام دے تحت شروعاتی طور تے 100 ملین امریکی ڈالر تیکر دی فنانسنگ مل سکے گی۔ خرم شہزاد نے آکھیا کہ ایس پروگرام نال مالیاتی ذرائع وِچ تنوع، عالمی سرمایہ کاراں تیکر رسائی تے پیداواری شعبیاں وِچ سرمایہ کاری نوں وادھا ملے گا۔