اک ہفتے وچ ڈیزل 15.66 روپے سستا، پٹرول 16.16 روپے فی لٹر مہنگا
ک ہفتے وچ ڈیزل 15.66 روپے سستا، پٹرول 16.16 روپے فی لٹر مہنگا
اسلام آباد (اسلم لُڑکا) مشرقِ وسطیٰ دی کشیدہ صورتحال تے ملک وچ پٹرول تے ڈیزل دیاں روزانہ بنیاد اُتے قیمتاں مقرر ہون دی وجہ نال روزمرہ زندگی اُتے شدید اثر پیا اے، جس دے باعث اشیائے ضروریہ دیاں قیمتاں تے ہور اخراجات وچ وی وڈا اضافہ ہویا اے۔
17 جولائی نوں کابینہ دے فیصلے دے تحت اوگرا عالمی منڈی وچ قیمتاں نوں مدِنظر رکھدیاں پٹرولیم مصنوعات دے نرخ روزانہ بنیاد اُتے مقرر کردا اے۔
18 توں 22 اگست دے دوران ڈیزل دی قیمت وچ مجموعی طور اُتے 16 روپے 97 پیسے فی لٹر اضافہ ہویا، جدویں اک دن لئی 32 روپے 63 پیسے کمی کیتی گئی۔ ایس طرح صارفین نوں پنج دناں وچ مجموعی طور اُتے 15 روپے 66 پیسے دا ریلیف مل سکیا۔
ایس دے نال ای پنج دناں دوران پٹرول 16 روپے 16 پیسے فی لٹر مہنگا ہویا تے ایس عرصے وچ صارفین نوں کوئی ریلیف نہیں دِتا گیا۔
18 اگست نوں ڈیزل دی قیمت وچ 6 روپے 47 پیسے فی لٹر اضافہ کیتا گیا، جس توں بعد نویں قیمت 390 روپے 42 پیسے مقرر ہوئی۔ 19 اگست نوں ہور 5 روپے 27 پیسے اضافے دے بعد قیمت 395 روپے 69 پیسے فی لٹر ہو گئی۔
20 اگست نوں اک دن لئی ڈیزل دی قیمت وچ 32 روپے 63 پیسے فی لٹر کمی کیتی گئی، جس نال قیمت 363 روپے 6 پیسے ہو گئی۔ 21 اگست نوں ڈیزل 1 روپے 64 پیسے مہنگا کرکے قیمت 364 روپے 70 پیسے، جدویں 22 اگست نوں ہور 3 روپے 59 پیسے اضافے دے بعد قیمت 368 روپے 29 پیسے فی لٹر مقرر کیتی گئی۔
پٹرول دی قیمت وچ 18 اگست نوں 5 روپے 77 پیسے فی لٹر اضافہ ہویا، جس توں بعد نویں قیمت 331 روپے 20 پیسے مقرر ہوئی۔ 19 اگست نوں ہور 3 روپے 34 پیسے اضافے نال قیمت 334 روپے 54 پیسے، 20 اگست نوں 2 روپے 97 پیسے اضافے نال 337 روپے 51 پیسے تے 21 اگست نوں 27 پیسے اضافے نال 337 روپے 78 پیسے فی لٹر ہو گئی۔
22 اگست نوں پٹرول دی قیمت وچ ہور 3 روپے 81 پیسے اضافہ کیتا گیا، جس توں بعد نویں قیمت 341 روپے 59 پیسے فی لٹر مقرر ہوئی۔
ہفتہ تے اتوار دی چھٹی دے باعث قیمتاں دا تعین نہیں کیتا جاندا۔ پیر توں جمعہ تک دوبارہ پٹرول تے ڈیزل دیاں قیمتاں روزانہ بنیاد اُتے مقرر کیتیاں جان گیاں، جس توں بعد پتا لگے گا کہ رواں ہفتے صارفین نوں کنا ریلیف ملدا اے۔
واضح رہے کہ وزیراعظم دی ہدایت اُتے ریفائنریاں نال گل بات دے نتیجے وچ ڈیزل اک دن لئی سستا کیتا گیا سی، پر اگلے دو دناں وچ ای اوہدی قیمت دوبارہ ودھانی پئی۔
