متفقہ حکمتِ عملی لئی اپوزیشن جماعتاں دا اج پہلا سانجھا پارلیمانی پارٹی اجلاس
قومی اسمبلی تے سینیٹ وچ حکومت نوں ٹف ٹائم دین تے ملک دی موجودہ سیاسی تے آئینی صورتحال اُتے متفقہ حکمتِ عملی اُتے غور کیتا جاوے گا۔ ایجنڈے دے اہم نکات وچ حکومت دی یکطرفہ قانون سازی دا رستہ روکنا تے اپوزیشن دے حقاں دے تحفظ لئی سانجھا محاذ قائم کرنا شامل اے۔
اسلام آباد (مانیٹرنگ ڈیسک) پارلیمنٹ وچ موجود ساریاں اپوزیشن جماعتاں دا پہلا تے اہم ترین سانجھا پارلیمانی پارٹی اجلاس اج شام 6 وجے پارلیمنٹ ہاؤس وچ طلب کر لیا گیا اے، متحدہ اپوزیشن دے باقاعدہ قیام دے وڈے اعلان دا قوی امکان اے۔
اطلاعات دے مطابق ایس اہم اجلاس دی میزبانی اپوزیشن لیڈر قومی اسمبلی محمود خان اچکزئی کرن گے، جدوں کہ اجلاس وچ اپوزیشن لیڈر سینیٹ علامہ راجہ ناصر عباس، جے یو آئی (ف) دے سربراہ مولانا فضل الرحمن، تحریکِ انصاف سمیت سنی اتحاد کونسل دے سارے ارکانِ پارلیمنٹ شرکت کرن گے۔
پی ٹی آئی ولوں چیئرمین بیرسٹر گوہر، سابق سپیکر اسد قیصر تے ہور سینئر ارکانِ پارلیمنٹ دی شرکت متوقع اے۔
اجلاس وچ قومی اسمبلی تے سینیٹ وچ حکومت نوں ٹف ٹائم دین تے ملک دی موجودہ سیاسی تے آئینی صورتحال اُتے یکساں مؤقف لئی متفقہ حکمتِ عملی اُتے غور کیتا جاوے گا۔
ایجنڈے دے اہم نکات وچ پارلیمنٹ اندر حکومت دی یکطرفہ قانون سازی دا رستہ روکنا، الیکشن کمیشن وچ نویاں تعیناتیاں اُتے اپوزیشن دا متفقہ تے سانجھا ناں سامنے لے کے آؤنا، پارلیمانی امور تے اپوزیشن دے حقاں دے تحفظ لئی سانجھا محاذ قائم کرنا شامل نیں۔
