ستمبر وچ 104 ارکانِ اسمبلی لئی فیملی سوٹس دا افتتاح ہووے گا

وزیراعظم رہائشگاہاں دا افتتاح کرن گے، منصوبے دے فرانزک آڈٹ دا مطالبہ، کوئی کرپشن نہیں ہوئی، ضرورت پئی تے آڈٹ کرایا جا سکدا اے: ذرائع

اسلام آباد (آن لائن) سپیکر قومی اسمبلی ایاز صادق دیاں کوششاں نال ارکانِ پارلیمنٹ لئی 104 اضافی فیملی سوٹس دی تعمیر آخری مرحلے وچ داخل ہو گئی اے۔ وزیراعظم شہباز شریف ستمبر وچ ارکانِ پارلیمنٹ دیاں اضافی رہائشگاہاں دا افتتاح کرن گے۔

ذرائع دے مطابق ایس ویلے 50 ارکانِ پارلیمنٹ سرکاری رہائشگاہ توں محروم نیں۔ ارکان لئی اضافی رہائشگاہاں دا منصوبہ 2010 وچ شروع کیتا گیا سی، تاہم تعمیر وچ مسلسل تاخیر دی وجہ نال ایس دی لاگت 3 ارب توں ودھ کے 8 ارب روپے تک پہنچ گئی۔

سپیکر ایاز صادق نے وزیراعظم توں منصوبے لئی خصوصی فنڈز منظور کروائے، جدوں کہ سی ڈی اے منصوبے اُتے کم کر رہیا اے۔ سپیکر نے منصوبہ ہر صورت ستمبر دے پہلے ہفتے تک مکمل کرن دی ہدایت کر دِتی اے۔

دوجے پاسے ذرائع دے مطابق مسلم لیگ (ن) دے دو سینیٹراں نے منصوبے دی تکمیل دے قریب فرانزک آڈٹ دا مطالبہ کر دِتا اے۔ ڈپٹی چیئرمین سینیٹ سیدال ناصر تے سینیٹر ناصر بٹ، شبر زیدی دی فرم توں منصوبے دا فرانزک آڈٹ کراؤن دے خواہش مند نیں۔

ذرائع دے مطابق چیئرمین سینیٹ یوسف رضا گیلانی تے سپیکر قومی اسمبلی ایاز صادق وی سینیٹراں دے ایس مطالبے اُتے حیران نیں۔ قومی اسمبلی دے ذرائع دا کہنا اے کہ منصوبے وچ کوئی کرپشن نہیں ہوئی، ضرورت محسوس ہوئی تے فرانزک آڈٹ منصوبے دی تکمیل توں بعد وی کرایا جا سکدا اے۔

ذرائع دے مطابق ساتھی ارکانِ پارلیمنٹ لئی رہائشگاہاں دے منصوبے دی مخالفت حیران کن اے۔