21 سابق کپتانان ولوں عمران خان دے علاج لئی اپیل
وزیراعظم شہباز شریف نوں دوجا خط لکھ دِتا، تِن مطالبے وی پیش کر دِتے، میڈیکل بورڈ نوں مکمل معائنے دی اجازت تے ہفتہ وار ملاقاتاں یقینی بناؤن دا مطالبہ
لاہور (سپورٹس ڈیسک) دنیا بھر توں تعلق رکھن والے 21 سابق بین الاقوامی کرکٹ کپتاناں نے اک واری فیر وزیراعظم شہباز شریف نوں خط لکھ کے سابق پاکستانی کپتان تے وزیراعظم عمران خان نوں طبی سہولتاں فراہم کرن دی اپیل کیتی اے۔ سابق کپتاناں ولوں گزشتہ چھ ماہ دوران وزیراعظم نوں ایہ دوجی اپیل اے۔
خط وچ آکھیا گیا اے کہ سپریم کورٹ نے عمران خان نوں طبی معائنے لئی ہسپتال منتقل کرن دا حکم دِتا سی، جتھے اُنہاں دا معائنہ ایسے میڈیکل بورڈ نے کرنا سی جس وچ اُنہاں دے ذاتی معالجین تے بہن ڈاکٹر عظمیٰ خان وی شامل ہون۔ عدالت نے ہفتہ وار اہلِ خانہ نال ملاقاتاں وی بحال کرن دا حکم دِتا سی۔
سابق کپتاناں نے تشویش دا اظہار کردیاں آکھیا کہ عمران خان دا ہسپتال وچ قیام صرف کجھ گھنٹیاں تک محدود رہیا۔ اُنہاں دا معائنہ عدالت دی ہدایت مطابق تشکیل دِتے گئے میڈیکل بورڈ دی بجائے حکومت ولوں مقرر کردہ ٹیم نے کیتا، جس نے اُنہاں نوں طبی طور اُتے صحت مند قرار دے کے عدالتی میڈیکل بورڈ دی کارروائی مکمل ہون توں پہلاں مُڑ اڈیالہ جیل منتقل کر دِتا۔
خط وچ سابق کپتاناں نے تِن مطالبے پیش کیتے نیں۔ اُنہاں آکھیا کہ سپریم کورٹ دی ہدایت اُتے تشکیل دِتے گئے میڈیکل بورڈ، جس وچ عمران خان دے ذاتی ڈاکٹر وی شامل نیں، نوں اُنہاں دی صحت دا مکمل تے آزادانہ معائنہ کرن دی اجازت دِتی جاوے، خاص طور اُتے سجی اکھ دی مبینہ متاثرہ نظر دا جائزہ لیا جاوے۔
اُنہاں مطالبہ کیتا کہ سپریم کورٹ ولوں بحال کیتیاں گئیاں اہلِ خانہ نال ہفتہ وار ملاقاتاں بلا تعطل تے انتظامی تاخیر توں بغیر یقینی بنائیاں جان۔ طبی معائنے دے نتائج جو وی ہون، اوہدے وچ تجویز کیتا گیا علاج وی فوری طور اُتے فراہم کیتا جاوے۔
سابق کپتاناں نے آکھیا کہ اوہ ایہ خط سیاستداناں دی حیثیت نال نہیں بلکہ سابق ساتھیواں تے حریفاں دی حیثیت نال لکھ رہے نیں، جنہاں دے درمیان کرکٹ دے میدان وچ تعلق قائم ہویا۔ اُنہاں واضح کیتا کہ اُنہاں دا مقصد پاکستان دے داخلی قانونی معاملات وچ فیصلہ دینا نہیں۔
خط اُتے دستخط کرن والیاں وچ گریگ چیپل، ایان چیپل، ایلن بارڈر، سنیل گواسکر، ڈیوڈ گاور، کلائیو لائیڈ، ارجونا راناتنگا، سٹیو وا تے جان رائٹ سمیت 21 سابق کپتان شامل نیں۔
رواں سال فروری وچ وی 14 سابق بین الاقوامی کپتاناں نے عمران خان دی صحت بارے تشویش دا اظہار کردیاں وزیراعظم نوں خط لکھیا سی۔
