جُڑواں شہراں وچ شدید بارش، نالہ لئی وچ طغیانی، ایمرجنسی نافذ
ہیڈ گنڈا سنگھ توں 95 ہزار کیوسک دا ریلا گزرن نال زمینی کٹاؤ، خیبر پختونخوا وچ بارشاں نال لینڈ سلائیڈنگ دا خدشہ، کئی علاقیاں وچ سیلابی صورتحال
راولپنڈی، اسلام آباد، تلونڈی ملک دے مختلف شہراں وچ بادل چھا جان توں بعد اسلام آباد تے راولپنڈی وچ تیز بارش نال نشیبی علاقیاں وچ پانی جمع ہو گیا، جدوں کہ نالہ لئی وچ پانی دی سطح وی بلند ہو گئی۔
نالہ لئی وچ کٹاریاں دے مقام اُتے پانی دی سطح 20 فٹ، جدوں کہ گوالمنڈی دے مقام اُتے 16 فٹ تک پہنچ گئی۔ جی سکس وچ انڈر پاسز بارشی پانی نال بھر گئے، جدوں کہ کئی علاقیاں وچ بارش دا پانی گھراں وچ داخل ہو گیا۔ بجلی دی فراہمی وی متاثر ہوئی۔ بارش دے پیشِ نظر راولپنڈی وچ رین ایمرجنسی نافذ کر دِتی گئی اے۔
خیبر پختونخوا دے مختلف ضلعیاں وچ موسلا دھار بارشاں دے باعث پہاڑی علاقیاں وچ لینڈ سلائیڈنگ دا خدشہ ظاہر کیتا گیا اے، جدوں کہ کئی علاقیاں وچ سیلابی صورتحال پیدا ہو گئی اے۔
محکمہ موسمیات دے مطابق دیر، سوات، کوہستان، مالاکنڈ، شانگلہ، چترال، بٹگرام تے بونیر وچ گرج چمک نال بارش دا امکان اے۔
دوجے پاسے دیر بالا تے دیر لوئر دے مختلف علاقیاں وچ طوفانی بارشاں دے باعث ندی نالیاں وچ طغیانی آ گئی، جدوں کہ دریائے پنجکوڑہ وچ پانی دی سطح بلند ہو گئی اے۔ پاتراک کوہستان توں وادی کمراٹ تک سیلابی صورتحال پیدا ہو گئی اے تے متعدد مقامات اُتے سڑکاں سیلابی ریلے تے لینڈ سلائیڈنگ نال متاثر ہوئیاں نیں۔
بھارتی آبی جارحیت جاری، فیروزپور ہیڈ گنڈا سنگھ توں 95 ہزار کیوسک دا ریلا گزرن نال خطرناک زمینی کٹاؤ شروع ہو گیا اے، جس نال قریبی آبادیواں نوں شدید خطرات لاحق ہو گئے نیں۔
زمینی کٹاؤ دی زد وچ آون والے علاقیاں وچ کنگن پور توں کوٹھی فتح محمد، قلعی شاہو، چھبر بند بھیڈیاں، عثمان، کمالپورہ تے ہور پنڈ شامل نیں۔ مقامی آبادی نے خدشہ ظاہر کیتا اے کہ پانی دا بہاؤ برقرار رہن دی صورت وچ ہور زرعی رقبہ تے آبادی متاثر ہو سکدی اے۔
محکمہ موسمیات دے مطابق اگلے 24 گھنٹیاں دوران پنجاب دے زیادہ تر علاقیاں وچ موسم گرم تے مرطوب رہن دا امکان اے، تاہم لاہور سمیت کئی علاقیاں وچ شام یا رات دے ویلے تیز ہواواں تے گرج چمک نال بارش ہو سکدی اے۔
